Një studim i ri nga shkencëtarët e Universitetit Leiden sugjeron se ndryshimet klimatike, veçanërisht rritja e nivelit të dioksidit të karbonit (CO₂), mund të ndikojnë drejtpërdrejt në shtimin në peshë të njerëzve.
Sipas tyre, CO₂ i lartë po e ndryshon përbërjen e shumë kulturave ushqimore të rëndësishme, duke i bërë më kalorike, por duke ulur vlerat ushqyese. Rritja e CO₂ rrit fotosintezën, proces që prodhon më shumë sheqerna dhe niseshte në bimë, duke shtuar kaloritë. Por kjo rritje vjen në kurriz të proteinave dhe mineraleve esenciale, duke ulur vlerën ushqyese të ushqimit.
Studimi, i botuar në Global Change Biology, analizoi të dhënat nga dhjetëra kërkime ku kultura të ndryshme si orizi, gruri, elbi, patatja, domatet, soja dhe bishtajoret janë rritur në nivele të ndryshme CO₂, brenda dhe jashtë. Në total u vlerësuan 43 kultura ushqimore. Rezultatet treguan se kur niveli i CO₂ dyfishohet, ndikimi negativ në lëndët ushqyese pothuajse dyfishohet gjithashtu. Mesatarisht, proteinat, hekuri dhe zinku ulen me rreth 4.4%, ndërsa në disa kultura rënia arrin deri në 38%.
Disa nga ushqimet më të prekura janë qiqrat, orizi dhe gruri, 3 prej kulturave më të konsumuara globalisht. Shkencëtarët paralajmërojnë se kjo rënie e vlerave ushqyese rrezikon të rrisë nivelet e obezitetit dhe të dobësojë imunitetin, edhe për njerëzit që hanë në mënyrë të balancuar dhe bëjnë aktivitet fizik. Në të njëjtën kohë, rritja e kalorive në secilin ushqim mund të nxisë shtimin në peshë pa ndryshuar sasinë e ushqimit.
Studimi sugjeron gjithashtu se disa substanca të dëmshme, si merkuri dhe plumbi, mund të rriten në përqendrim, megjithëse kërkohen më shumë prova. Këto ndryshime mund të çojnë drejt fenomenit të “urisë së fshehur”, ku njerëzit marrin kalori të mjaftueshme, por jo lëndët ushqyese të nevojshme.
