Jeff Bezos, themeluesi miliarder i Amazon dhe ish-CEO i kompanisë, po rikthehet në rolin e drejtuesit ekzekutiv pas 4 vitesh pauzë. Këtë herë, ai i ka caktuar vetes postin e bashkë-CEO në një startup të ri të inteligjencës artificiale të quajtur Project Prometheus, sipas një raporti të New York Times. Projekti synon të zhvillojë teknologji AI për inxhinierinë dhe prodhimin në një gamë të gjerë industrish dhe ka arritur të sigurojë tashmë 6.2 miliardë dollarë financim, shumë që e tejkalon atë të dhjetëra startup-eve tradicionale.
Bezos do të drejtojë kompaninë së bashku me Vik Bajaj, një emër i njohur në botën e teknologjisë. Bajaj, fizikant dhe kimist, ka qenë i lidhur prej kohësh me projektet e avancuara të Google X dhe është bashkëthemelues i startup-it të shëndetit Verily. Dyshja kanë ndërtuar një ekip prej të paktën 100 punonjësish, duke tërhequr talente nga kompani të mëdha si OpenAI, DeepMind dhe Meta. Megjithatë, detajet për funksionimin e brendshëm, teknologjinë dhe vendndodhjen e Project Prometheus mbeten të paqarta, pasi Bezos nuk ka zbuluar pothuajse asgjë publikisht.
Lëvizja vjen në një treg të mbingarkuar me investime në AI, ku miliarda dollarë po derdhen në kompani si OpenAI, ndërsa të tjera po mbështeten nga investime të mëdha për të përshpejtuar ndërtimin e modeleve të reja.
Megjithatë, ndërsa industria po zgjerohet me ritme të shpejta, disa ekspertë po ngrejnë shqetësime për qëndrueshmërinë financiare të saj. Investitori i njohur Michael Burry, i famshëm për parashikimin e krizës së vitit 2008, ka vënë 1 miliard dollarë në baste kundër Palantir dhe Nvidia, duke akuzuar kompanitë e mëdha të teknologjisë se po përdorin “truke” për të rritur artificialisht fitimet.
