Një studim i kryer në Zvicër ka zbuluar se përveç faktorëve të zakonshëm si ekspozimi ndaj ekraneve, konsumimi i kafeinës apo kryerja e aktiviteteve fizike gjatë ditës, edhe Hëna luan një rol në cilësinë e gjumit që ne bëjmë gjatë natës.
Sipas ekspertëve, ndarja mes efekteve fizike dhe psikologjike që ndikojnë në cilësinë e gjumit është sfiduese. Shumë njerëz kanë një lidhje emocionale me Hënën e plotë, gjë që mund të krijojë pritshmëri për gjumë jo të qetë, një efekt placebo i mundshëm. Megjithatë, disa studime sugjerojnë dhe prezencën e ndikimeve biologjike. Studimi i vitit 2013 zbuloi se gjatë hënës së plotë pjesëmarrësit flinin 20 minuta më pak, u duhej më shumë kohë për të fjetur dhe kishin 30% më pak aktivitet të gjumit të thellë. Nivelet e melatoninës ishin gjithashtu më të ulëta, ndoshta për shkak të dritës së hënës që ndalon prodhimin e këtij hormoni.
Një studim tjetër konfirmoi se njerëzit flinin rreth 25 minuta më pak gjatë hënës së plotë, me burrat që preken më shumë se gratë. Megjithatë, kërkimet e mëvonshme nga Hungaria dhanë rezultate të kundërta, duke sugjeruar se gratë mund të përjetojnë më shumë ndërprerje gjumi. Këto studime, megjithatë, u zhvilluan në laboratorë gjumi, mjedise të panatyrshme që vetë mund të ndikojnë në rezultatet.
Për ta shmangur këtë kufizim, studiuesit e Universitetit të Washington-it analizuan gjumin e njerëzve në komunitete të ndryshme në Argjentinë, nga qytetet moderne te fshatrat pa energji elektrike, si dhe të studentëve në Seattle. Të gjithë flinin më pak dhe vonoheshin më shumë për të fjetur në netët para hënës së plotë. Sipas shkencëtarëve, ky mund të jetë një instinkt evolucionar: paraardhësit tanë shfrytëzonin dritën e hënës për të punuar ose socializuar.
Ekspertët janë dakord se drita artificiale e ekraneve ka sot një ndikim shumë më të madh se Hëna. Por edhe në epokën moderne, ajo vazhdon të na kujtojë se ritmet tona të gjumit janë ende të lidhura me natyrën.
