Këtë dekadë, qeveria amerikane ka intensifikuar kontrollin ndaj kompanive kineze që operojnë në territorin e saj. Pas veprimeve kundër ZTE dhe Huawei, si dhe përpjekjeve të vazhdueshme kundër TikTok, tani vëmendja është përqendruar te OnePlus.
Sipas Reuters, një komitet dypartiak i Kongresit, i udhëhequr nga republikani John Moolenaar dhe demokrati Raja Krishnamoorthi, i ka kërkuar qeverisë të hetojë OnePlus për shkak të lidhjeve me Kinën. Dyshohet se telefonat e kësaj kompanie mund të mbledhin dhe transmetojnë të dhëna të përdoruesve në servera të kontrolluar nga pala kineze.
Edhe pse OnePlus është njohur ndërkombëtarisht si një markë me pajisje cilësore, origjina kineze mbetet e qartë. Kompania ka fituar popullaritet për telefonat e fuqishëm me çmime më të ulëta, duke ndërtuar me kohë një imazh global që distancohet nga origjina e saj.
Megjithatë, popullariteti nuk i mbrojti as Huawei dhe as TikTok, të cilat gjithashtu përballen me kufizime në SHBA. Shqetësimi kryesor mbetet siguria kombëtare dhe privatësia e të dhënave, sidomos kur kompanitë kanë lidhje me qeverinë kineze.
Aktualisht, nuk është nisur një hetim zyrtar ndaj OnePlus. Kërkesa për hetim mbështetet në një “analizë të fundit” nga një kompani tregtare e paidentifikuar, pa prova konkrete të paraqitura publikisht.
Në muajt në vijim do të mësohet nëse OnePlus do të bëhet kompania tjetër kineze që përballet me veprime ndaluese nga SHBA.
