Gjatë një konference të teknologjisë në Austin, Texas, Michael Kratsios, Drejtori i Politikës së Shkencës dhe Teknologjisë në Shtëpinë e Bardhë nën administratën Trump, bëri deklarata të bujshme mbi fuqinë e teknologjisë amerikane. Ai pretendoi se SHBA tani zotëron teknologji që mund të “manipulojë kohën dhe hapësirën” dhe “të zhdukim distancat”, megjithëse nuk sqaroi nëse fliste në mënyrë metaforike apo të drejtpërdrejtë. Kjo ka nxitur spekulime të shumta online.
Kratsios e përshkroi këtë periudhë si “drita e hershme e Epokës së Artë të Amerikës”, duke kërkuar një rilindje kombëtare në inovacion, të krahasueshme me përparimet e shekullit të 20-të si programi Apollo dhe zhvillimi i internetit. Ai kritikoi rënien e vrullit inovativ që nga vitet ’70 për shkak të rregulloreve penguese dhe mungesës së ambicies në sektorët kyç si energjia bërthamore dhe hapësira.
Për të përballuar sfidat, ai theksoi nevojën për të rritur produktivitetin përmes teknologjisë në vend të mbështetjes në fuqi punëtore të lirë dhe imigracion. Ai argumentoi se vendi duhet të “shkëputet nga gjendja e rëndë” e dekadave të fundit dhe të hyjë në një epokë të re guximi dhe shpikjeje.
Në fundin e deklaratës ai përsëriti pretendimin e tij më të guximshëm: “Është zgjedhjet e individëve… për të krijuar teknologji të reja dhe për t’u dhënë pas zbulimeve shkencore që do të manipulojnë kohën dhe hapësirën”.
Në planin global, Kratsios lidh inovacionin me sigurinë kombëtare dhe propozoi një strategji për të mbrojtur teknologjinë amerikane nga konkurrentët si Kina, përmes mbrojtjes së pronës intelektuale, zinxhirëve të furnizimit dhe kontrolleve të eksportit. Ai u bëri thirrje qytetarëve dhe novatorëve të marrin pjesë aktive në ruajtjen e epërsisë teknologjike dhe trashëgimisë amerikane.
