Shpesh herë kur udhëtojmë mendojmë se jemi të përgatitur për gjithçka, por shpesh herë hasim probleme të cilat nuk i kemi menduar më parë, sidomos kur vjen puna tek pajisjet teknologjike. Më poshtë do të përmendim 5 gabimet më të shpeshta që ne bëjmë që na prishin cilësinë e pushimeve.
Blerja e biletave në website të panjohura
Shumë persona kërkojnë t’ju mashtrojnë dhe krijojnë website të rreme për t’ju vjedhur paratë duke mos ofruar shërbimin e premtuar. Për të shmangur këto surpriza të pakëndshme, ju mund të kërkoni në burimet zyrtare apo të shikoni online reviews dhe vlerësimet nga klientë të ndryshëm.
Shumë agjenci udhëtimi janë gjithashtu të licencuar apo akredituar për shërbimin e tyre, si dhe përdorin opsione pagese të sigurta.
Përdorimi i karikuesve publikë në aeroport
Një karikues publik mund të jetë si një dhuratë për ju kur bateria juaj po mbaron, por ato janë jashtëzakonisht të lehta për t’u manipuluar. Vetëm me një kabllo USB, një kriminel kibernetik mund të instalojë malware ose të marrë të dhëna nga çdo pajisje që futet në prizë për të karikuar.
Nëse dëshironi të mbroheni nga ky fenomen, mund të blini një USB që lejon vetëm karikimin e pajisjes. Gjithashtu pajisjet e reja kërkojnë miratimin tuaj nëse dëshironi të transferoni të dhëna kur lidheni me një USB. Zgjidhni opsionin “charge only”.
Lënia hapur e AirDrop
Mos pranoni asnjëherë të dhëna që mund t’ju vijnë nga persona që nuk i njihni në AirDrop. Shkoni në Settings > General > AirDrop , dhe mund të lejoni transferimin e të dhënave vetëm nga kontaktet tuaja.
Dhënia e telefonit një personi të panjohur për të shkrepur një fotografi
Shpesh herë ne mund të dëshirojmë të bëjmë një foto për të kujtuar kohën e bukur që po kalojmë në një vend të ri, dhe i kërkojmë një personi të panjohur të na ndihmojë. Në këto momente mund dhe të qëllojë që të zhbllokojmë telefonin dhe ta lëmë atë të ekspozuar, ndërkohë që ky person mund të largohet me të gjitha të dhënat e rëndësishme që kemi të ruajtura në smartphone.
Harrimi i kontrollimit të planeve roaming
Para se të niseni në një udhëtim, bëni mirë që të interesoheni në website-in e kompanisë telefonike për planet roaming që ato ofrojnë, para se të bëni shpenzime të panevojshme që mund t’ju kushtojnë shtrenjt. Në disa raste, përdorimi i një eSIM mund të jetë akoma dhe më i favorshëm.
