Adobe sapo ka prezantuar disa shërbime të reja të inteligjencës artificiale që mund të krijojnë dhe modifikojnë video, duke sfiduar në mënyrë të drejtpërdrejtë gjigandët e tjerë të teknologjisë si OpenAI dhe Meta.
Një shërbim i integruar në softuerin e Adobe Premiere do t’i lejojë përdoruesit të zgjerojnë videoklipet duke përdorur AI gjeneruese, njoftoi kompania të hënën në konferencën e saj vjetore të produkteve në Miami. Shërbime të tjera do t’i lejojnë përdoruesit të prodhojnë video duke u bazuar në kërkesat në tekst apo imazhe ekzistuese.
Kompanitë si OpenAI, Meta Platforms dhe Google e Alphabet i kanë prezantuar gjeneruesit e videove me AI, por momentalisht vetëm Adobe e ka bërë këtë shërbim gjerësisht të disponueshme për klientët.
“Ajo që dëgjojmë kur flasim me klientët tanë është se gjithçka duket shumë e bukur, por ata nuk kanë patur mundësinë ta përdorin shërbimin,” tha Ely Greenfield, shefi i teknologjisë së Adobe për mediat dixhitale, për teknologjinë e konkurrentëve. Shërbimet e reja të videove të Adobe janë “të dizajnuara për punë reale dhe integrim në produkte“, tha ai.
Gjatë vitit të kaluar, Adobe është fokusuar në shtimin e shërbimeve gjeneruese të AI në portofolin e saj të softuerit për profesionistët krijues, duke përfshirë produktet kryesore Photoshop dhe Illustrator. Adobe ka kërkuar të diferencojë modelet e saj si “komercialisht të sigurta” për shkak të të dhënave të kujdesshme të trajnimit dhe moderimit kufizues.
:format(webp)/cdn.vox-cdn.com/uploads/chorus_asset/file/25615443/camera_settings.png)
Për shembull, ka fytyra të caktuara që Adobe do t’i bllokojë nëse përdoruesit përpiqen të gjenerojnë video të tyre, tha Greenfield. Rivalët janë vënë nën kritika për përdorimin e të dhënave të mbrojtura nga e drejta e autorit për të stërvitur modelet e AI. Modelet e videove të Adobe u trajnuan kryesisht në video dhe foto nga biblioteka e saj e madhe e mediave dhe agjencitë krijuese, tha Greenfield. Në disa raste kompania me bazë në San Jose, Kaliforni përdori domenin publik ose të dhëna të licencuara, shtoi ai.
Adobe nuk po tarifon ende për përdorimin e veçorive të saj të AI përtej tarifave standarde të abonimit, megjithatë kjo gjë mund të ndryshojë në të ardhmen.
