Rreth një e pesta e hard disqeve nga industria e mediave janë plotësisht “të vdekura”, tha kompania e menaxhimit të informacionit të ndërmarrjes Iron Mountain, e cila është e specializuar në menaxhimin, rezervimin, rikuperimin dhe shkatërrimin e të dhënave. Kjo do të thotë se informacioni që gjendet brenda atyre disqeve mund të humbasin përgjithmonë nëse të dhënat nuk janë të ruajtura në një hapësirë tjetër.
“Është shumë e trishtueshme të shohësh një projekt që hyn në studio, një hard disk krejt të ri me mbështjellësin dhe etiketat, ndërkohë që në të vërtetë ky hard disk nuk funksionon”, tha Robert Koszela, Drejtor Global për Iniciativat Strategjike dhe Rritje për Iron Mountain Media & Archive Services.
Përdorimi i hard drives në vend të ruajtjes në kaseta filloi seriozisht në vitet 2000 me ardhjen e 5.1 Surround Sound dhe Guitar Hero. Këto teknologji kërkonin që shtëpitë diskografike të ripërpunonin këngët e tyre dhe ata zbuluan se disa nga kasetat që përdornin për të ruajtur regjistrimet origjinale kishin filluar të dëmtoheshin, me disa që nuk mund të luheshin aspak.
Ata kishin gjithashtu disa kaseta që ende dukeshin mirë, por nuk kanë më ndonjë pajisje të përputhshme për t’i luajtur ato. Për shkak të kësaj, Mix thotë se industria e muzikës është fokusuar në tranzicionin e arkivave të saj të kasetave në media dixhitale si hard disqet. Megjithatë, ashtu si kasetat me shirit, dhe hard disqet gjithashtu përkeqësohen – me shumicën e tyre të vlerësuara për një jetëgjatësi vetëm tre deri në pesë vjet.
Fatmirësisht, studiuesit kanë punuar vazhdimisht për të krijuar teknologji të reja që janë më të besueshme se hard disqet. Microsoft Research, krahu i kërkimit dhe zhvillimit të gjigantit të software-it, po teston ruajtjen e sasive të mëdha të të dhënave në pllaka xhami për më tepër se 10,000 vite në një iniciativë futuriste të quajtur “Project Silica“.
