Fëmijët nën dy vjeç nuk duhet të ekspozohen ndaj asnjë ekrani dhe adoleshentët nuk duhet të kalojnë më shumë se tre orë para ekranit në ditë, sipas udhëzimeve të shpallura nga autoritetet shëndetësore në Suedi.
Udhëzimet e shpallura të hënën shënojnë herën e parë që Folkhälsomyndigheten, autoriteti shëndetësor publik i Suedisë, ka përcaktuar se si prindërit duhet të rregullojnë kohën para ekranit për fëmijët e vegjël. Përdorimi i ekranit tek fëmijët dy deri në pesë vjeç duhet të kufizohet deri në një orë, ndërsa fëmijët nga gjashtë deri në 12 vjeç nuk duhet të përdorin ekranet për më shumë se dy orë. Për moshat 13 deri në 18 vjeç, kufiri është tre orë.
Ky është një reduktim i konsiderueshëm i mesatares aktuale të kohës që fëmijët dhe të rinjtë suedezë shpenzojnë para ekraneve, e cila vlerësohet të jetë katër orë në ditë për 9-12-vjeçarët dhe më shumë se shtatë orë në ditë – pa përfshirë detyrat e shkollës – për 17 dhe 18 vjeç.
“Për një kohë shumë të gjatë ne kemi lejuar që ekranet dhe aplikacionet të vjedhin kohën dhe vëmendjen me koston e asaj që ne e dimë se është e nevojshme për t’u ndjerë mirë. Ne e dimë se përdorimi i mediave dixhitale mund të ketë efekte negative shëndetësore, duke përfshirë përkeqësimin e gjumit dhe simptomat e depresionit”, tha ministri i Çështjeve Sociale, Jakob Forssmed. “Me këto rekomandime të përshtatshme për moshën, tani ka një mbështetje të rëndësishme për fëmijët dhe të rinjtë, prindërit dhe kujdestarët e tjerë, për një përdorim më të shëndetshëm, të ndërgjegjshëm dhe të përgjegjshëm të ekraneve dhe mediave dixhitale.”
Agjencia shëndetësore rekomandoi gjithashtu që fëmijët të mos përdorin ekranet para gjumit dhe që pajisjet inteligjente të mos lejohen në dhomat e gjumit gjatë natës. “Shëndeti i fëmijëve po paguan çmimin për fitimet e kompanive të teknologjisë,” tha Forssmed. Udhëzimet, të cilat u drejtohen të rriturve dhe fëmijëve, përfshijnë gjithashtu motivim dhe këshilla se si të mendohet për këtë çështje.
Në fillim të këtij viti, një studim shkencor tre-mujor në Francë, i porositur nga presidenti, Emmanuel Macron, arriti në përfundimin se fëmijët nën tre vjeç nuk duhet të ekspozohen ndaj ekraneve, përfshirë televizorin dhe asnjë fëmijë nuk duhet të ketë telefon para moshës 11 vjeç.
