Modaliteti i ri i avancuar Voice Mode i OpenAI për ChatGPT po fillon të shpërndahet për një numër të vogël njerëzish të abonuar në ChatGPT Plus.
Funksioni, të cilin OpenAI e prezantoi për herë të parë në eventin e lançimit të GPT-4o në maj, u kritikua për krijimin e një zëri të ngjashëm me Scarlett Johansson dhe më vonë u ndalua prezantimi i tij në treg për arsye sigurie. Në ngjarjen e fundit të OpenAI, modaliteti i ri i zërit dukej se ishte më i aftë se modaliteti aktual i zërit i ChatGPT.
Dhe pse ndërpritej gjatë tregimit nga punonjësit e OpenAI, chatbot-i ishte në gjendje të përshtaste përgjigjet për secilën kërkesë të tyre në një kohë mjaft të shpejtë. Modaliteti i avancuar pritej të prezantohej në fund të qershorit, por OpenAI vonoi prezantimin me një muaj për të “përmirësuar aftësinë e modelit për të zbuluar dhe refuzuar diskutimin rreth përmbajtjeve të caktuara“.
Zëdhënësja e OpenAI Taya Christianson thotë se kompania testoi aftësitë e modelit zanor me më shumë se 100 ekipe të jashtme (njerëz që përpiqen të sulmojnë teknologjitë për të gjetur dobësitë). Kompania kohët e fundit është përballur me shumë shqyrtime në lidhje me politikat e saj të sigurisë, kështu që kjo pauzë mund të ketë qenë zgjedhja e duhur.
OpenAI ka “shtuar gjithashtu filtra të rinj që do të njohin dhe bllokojnë disa kërkesa për të gjeneruar muzikë ose audio të tjera që mbrohen nga të drejtat e autorit”, thotë Christianson.
Christianson shton se modaliteti i ri i ChatGPT do të përdorë vetëm katër zëra të paracaktuar nga aktorët zanorë, duke shtuar, “Ne e kemi bërë atë në mënyrë që ChatGPT të mos mund të imitojë zërat e njerëzve të tjerë, si individë ashtu edhe figura publike, dhe do të bllokojë daljet që ndryshojnë nga njëri prej këta zëra të paracaktuar.” OpenAI planifikon të sjellë modalitetin e ri për të gjithë përdoruesit e ChatGPT Plus në vjeshtë.
