Ylli i Hollivudit Scarlett Johansson ka thënë se ajo mbeti “e tronditur” dhe “e zemëruar” pasi OpenAI lançoi një chatbot me një zë që “çuditërisht” është mjaft i ngjashëm me zërin e saj.
Aktorja tha se më parë kishte refuzuar një ofertë nga kompania për të qenë zëri i chatbot-it të saj të ri, i cili lexon tekstin me zë për përdoruesit. Kur modeli i ri debutoi javën e kaluar, komentuesit nxituan të bënin krahasime midis zërit të chatbot-it “Sky” dhe zërit të Johansson në filmin “Her” të vitit 2013.
OpenAI tha të hënën se do të hiqte zërin, por këmbënguli se nuk ishte menduar të ishte një “imitim” i zërit të Scarlet. Megjithatë, Johansson akuzoi kompaninë dhe themeluesin e saj Sam Altman, për kopjim të qëllimshëm të zërit të saj, në një deklaratë të parë nga BBC të hënën në mbrëmje.
“Kur dëgjova demonstrimin e bërë, u trondita, u zemërova dhe në mosbesim që zoti Altman do të përdorte një zë që tingëllonte kaq identik me timin”, shkroi ajo. “Z. Altman madje nënkuptoi se ngjashmëria ishte e qëllimshme, duke postuar një fjalë të vetme “Her” në X – një referencë për filmin në të cilin unë isha në rolin e Samantha, e cila krijon një marrëdhënie intime me një njeri.“
Filmi Her i vitit 2013 tregon se si aktori i luajtur nga Joaquin Phoenix dashurohet me sistemin operativ të pajisjes së tij, i cili shprehet me zërin e Johansson.
“[Z. Altman] më tha se ndjente se duke përdorur zërin tim, unë mund të ndihmoja në kapërcimin e hendekut midis kompanive të teknologjisë dhe krijuesve dhe t’i ndihmoja konsumatorët të ndiheshin rehat me ndryshimin madhor në lidhje me njerëzit dhe AI”, shkroi Johansson. Por ajo përfundimisht e refuzoi ofertën për arsye personale.
Dy ditë para se të publikohej chatbot-i Sky, Altman kontaktoi agjentin e saj, duke i kërkuar Johansson të rishqyrtonte refuzimin e saj fillestar për të bashkëpunuar me kompaninë.
