Shefi i Tesla-s, Elon Musk thotë se prodhuesi i makinave elektrike do të fillojë prodhimin dhe përdorimin e robotëve humanoidë nga viti i ardhshëm. Në një postim në rrjetet sociale, ai tha se robotët do të përdoren fillimisht nga Tesla, e cila do të fillojë t’i shesë në vitin 2026.
Njoftimi erdhi pasi miliarderi i teknologjisë po bën çmos për të ulur kostot në Tesla pas uljes së kërkesave për makinat e saj. Të martën, kompania raportoi se fitimet pothuajse ishin përgjysmuar gjatë tremujorit deri në fund të qershorit, duke rënë nga 2.7 miliardë dollarë në më pak se 1.5 miliardë dollarë.
“Në përgjithësi, fokusi ynë mbetet në uljen e kostos në të gjithë kompaninë,” tha kompania të martën në një përditësim për investitorët. Tesla tha se të ardhurat e saj nga makinat elektrike ranë 7% nga viti në vit në tremujor, pavarësisht uljes së çmimeve dhe stimujve të tjerë që synojnë të joshin klientët. Megjithatë kompania regjistroi fitime të përgjithshme 2% falë rritjes së biznesit të ruajtjes së energjisë.
Bizneset e Musk janë fokusuar gjithnjë e më shumë në teknologji të tilla si inteligjenca artificiale, drejtimi autonom dhe robotët. Musk kishte thënë më parë se priste që roboti, i quajtur Optimus, të ishte gati për përdorim në fabrikat e Tesla deri në fund të këtij viti.
“Tesla do të ketë robotë humanoidë vërtet të dobishëm për përdorim të brendshëm në kompani vitin e ardhshëm dhe, shpresojmë që të rrisim prodhimin për të furnizuar dhe kompani të tjera në vitin 2026”, tha Musk në platformën e tij të mediave sociale X.
Tesla synon që robotët të prodhoheshin në masë dhe të kushtonin më pak se $20,000 secili. Megjithatë njihet për vendosjen e afateve ambicioze kohore për kompanitë e tij, të cilat nuk i ka përmbushur gjithmonë.
