Elon Musk njoftoi të hënën se do të ndalojë përdorimin e pajisjeve Apple në ambientet e kompanive të tij nëse krijuesi i iPhone vazhdon me integrimin e tij të planifikuar OpenAI.
Apple organizoi të hënën Worldwide Developer Conference, dhe lajmi më i madh ishte integrimi i ChatGPT në asistentin virtual të Apple, Siri. Në një shembull të treguar, Siri rekomandoi që përdoruesi i iPhone të konsultohej me ChatGPT për ide të mëtejshme të recetave për darkë, duke treguar në fund që këto përgjigje të reja vinin nga chatbot i OpenAI.
Musk iu përgjigj partneritetit në X, duke thënë se punonjësit dhe vizitorët në kompanitë e tij ‘do të duhet të lënë pajisjet e tyre Apple në derë‘ ku do të ruhen në një ‘kafaz Faraday’ – i cili bllokon fushat elektromagnetike. Ai vazhdoi: “Nëse Apple integron OpenAI në nivel të sistemit operativ, atëherë pajisjet Apple do të ndalohen në kompanitë e mia. Kjo është një shkelje e papranueshme e sigurisë.”
Siri do të pajiset me GPT-4o, versioni më i fundit i chatbot-it të famshëm që disa përdorues thonë se tingëllon si personazhi i Scarlett Johansson në filmin ‘Her’. Përpara postimit të Musk që kritikonte këtë bashkëpunim, Apple u premtoi përdoruesve të saj se ndryshe nga përdorimi i zakonshëm i ChatGPT direkt nga platforma e OpenAI, informacionet private të përdoruesve dhe pyetjet e tyre nuk do të regjistrohen ose ruhen.
Për të mësuar të gjitha risitë e prezantuara gjatë WWDC 2024, klikoni këtu.
