Apple po përshpejton zhvillimin e një unaze inteligjente për të gjurmuar shëndetin e përdoruesve, siç tregon një raportim i ri që vjen nga Korea. Apple e ka pasur prej vitesh idenë për të ofruar një unazë inteligjente, pasi ka patentuar teknologji të ndryshme, por me Samsung që është shumë pranë prezantimit të një produkti të tillë, është koha që Apple të rrisë konkurencën në këtë sektor.
Sipas Electronic Times, Apple i ka kushtuar vëmendje tregut dhe mësoi se një unazë inteligjente do të ishte një alternativë popullore, më e lehtë për t’u mbajtur se një orë inteligjente, madje dhe gjatë fjetjes.
“Duket e mundshme që komercializimi është i pashmangshëm,” tha një burim i brendshëm i industrisë i cituar në raportin e përkthyer. Unaza inteligjente “Galaxy Ring” e Samsung pritet të prezantohet gjatë eventit të dytë Unpacked të këtij viti, që me shumë mundësi do të zhvillohet në gjysmën e dytë të korrikut. Firma koreane shfaqi disa pamje të shpejta që konfirmuan ekzistencën e produktit në fund të eventit të parë Unpacked në janar, dhe tani pritet që produkti të hyjë në prodhim masiv në gjysmën e dytë të vitit. Galaxy Ring pritet gjithashtu të ofrojë monitorimin e EKG-së, gjurmimin e gjumit dhe funksionalitete për kontrollin e pajisjeve të tjera dhe kryerjen e pagesave.
Pajisja pritet të vijë në disa madhësi. Aktualisht Oura Ring është unaza më popullore, e cila është prezantuar për herë të parë nga kompania finlandeze e teknologjisë shëndetësore Oura në vitin 2015. Pajisja mbledh të dhëna për aktivitetin, rrahjet e zemrës, ritmin e frymëmarrjes dhe gjumin dhe i transmeton ato nëpërmjet Bluetooth në aplikacionin Oura.
Tani në gjeneratën e tretë, pajisja mund të matë gjithashtu temperaturën e trupit dhe ciklin menstrual, dhe thuhet se bateria zgjat një javë me një karikim të vetëm. Në mars 2022, Oura njoftoi se kishte shitur më shumë se një milion unaza.
