Një nga konceptet më të çuditshme nga të gjithë motorët është prezantuar nga Yamaha. Kjo kompani ka zbuluar versionin e dytë të konceptit të saj futurist Motoroid, me aftësi për njohjen e fytyrës me AI dhe për të balancuar veten.
Kompania thotë se Motoroid 2 është një eksplorim i pyetjes “si do të jenë në të vërtetë ndërfaqet njeri-makinë në të ardhmen?”
Motori duket sikur është ndërtuar në dy pjesë të ndryshme, ku ajo e parme mban pjesën më të madhe të mekanizmave që nevojiten për të vënë në lëvizje këtë motor. Pjesa e pasme e motorit, që fillon nga poshtë ndenjëses, është montuar në mënyrë të tillë që të lëvizë në drejtime të ndryshme pavarësisht drejtimit të gomës së përparme.
Pjesë e kësaj lëvizje të lirë do të jetë dhe kutia e baterisë, në mënyrë që të ndikojë dinamikisht në balancën e motorit. Yamaha e quan këtë sistem Active Mass Center Control System (AMCES).
Është e paqartë se si do të duhej ta kontrollonit këtë motor saktësisht, por nëpërmjet një kombinimi të drejtimit elektronik dhe AMCES, Motoroid 2 mund të vetëbalancohet dhe të lëvizë në mënyrë autonome. Nëpërmjet njohjes së fytyrës dhe kontrollit të gjesteve, drejtuesit mund t’i kërkojnë që motori t’i ndjekë ndërsa lëvizin në këmbë.
