Ditën e djeshme Elon Musk bëri me dije se në Twitter do të vendoset një limit ditor i postimeve që mund të lexoni në platformë për kategori të ndryshme përdoruesish. Duket se kjo lëvizje është pjesë e një programi të ri të përkohshëm që po mundohet të adresojë nivelet ekstreme të shkarkimit të të dhënave nga qindra organiziata të ndryshme dhe manipulimeve në sistem.
Fillmisht, Elon Musk tregoi në profilin e tij se përdoruesit e verifikuar në platformë do të mund të lexonin deri në 6,000 postime në ditë, ndërkohë që për përdoruesit jo të verifikuar numri i postimeve që mund të lexojnë ulet drastikisht në 600 postime në ditë. Ekziston dhe një kategori e tretë e “përdoruesve të rinj dhe jo të verifikuar” të cilët mund të lexonin vetëm 300 postime në ditë.
Now to 10k, 1k & 0.5k
— Elon Musk (@elonmusk) July 1, 2023
Megjithatë pronari i Twitter ka deklaruar përmes tweet-eve të mëvonshme se ky numër është rritur në 10,000 për përdoruesit e verifikuar, 1,000 për përdoruesit jo të verifikuar dhe 500 për përdoruesit e rinj jo të verifikuar.
Më parë Musk kishte deklaruar se ishte i shqetësuar nga niveli i lartë i të dhënave të Twitter që shkarkoheshin nga organizata të ndryshme, dhe tregoi se do të ndërmerrte disa masa për të parandaluar këtë fenomen.
Më herët gjatë kësaj jave, Twitter nisi që të mos lejonte leximin e tweets nga personat që nuk ishin të regjistruar në platformë.
