Philip Morris International (PMI) zhvilloi disa ditë më parë Technovation, një ngjarje unike që mblodhi media, shkencëtarë dhe drejtues të kompanisë për të vërtetuar se e ardhmja pa tym është më e arritshme se kurrë. E gjitha ndodhi brenda “The Cube”, qendrës së kërkimit dhe zhvillimit në Neuchâtel, Zvicër, aty ku shkencëtarët i kanë dedikuar vite të tëra gjetjes së mënyrave alternative që i japin duahnpirësve të rritur që zgjedhin të mos lënë duhanin një zgjidhje më pak të dëmshme. Dhe aty ku ka teknologji, Geek Room nuk ka si të mungojë.
Më shumë se 1.2 miliardë njerëz në botë janë konsumues të duhanit.
Sipas Organizatës Botërore të Shëndetësisë (OBSH), 1.2 miliardë njerëz në botë janë konsumues të cigares dhe ky numër pritet të mbetet i njëjtë deri në vitin 2025. Megjithatë, këto shifra duhet të ndryshojnë. Për duhanpirësit aktualë, gjëja më e mirë për të bërë është të lënë cigare dhe nikotinën krejtësisht, por shumica nuk e lënë. Këta persona, të cilët në të kundërt do të vazhdonin të konsumonin cigare meritojnë akses dhe informacion për alternativat efektive të vërtetuara shkencërisht ndaj duhanpirjes. Që nga viti 2008, PMI ka investuar më shumë se 10.5 miliardë dollarë në kërkimin dhe zhvillimin e alternativave të mbështetura shkencërisht pa tym për duhanpirësit që në të kundërt do të vazhdonin të pinin cigare.
“Një e ardhme pa cigare është vetëm fillimi i përmbushjes së misionit tonë. Ne jemi të përkushtuar të kemi një ndikim pozitiv në shoqëri dhe për këtë qëllim ne po punojmë për të zgjeruar qëllimin tonë, duke evoluar në një kompani më të gjerë jetësore, mirëqenieje konsumatore dhe kujdesi shëndetësor. Ne synojmë që pas 10 vitesh cigaret të vendosen në muze,” u shpreh Jacek Olzcak, CEO i PMI.
Përse alternativat pa tym janë më pak të dëmshme?
Tymi i cigares përmban më shumë se 6000 kimikate. Nga këto, rreth 100 janë identifikuar nga ekspertët e shëndetit publik si të dëmshme ose potencialisht të dëmshme dhe të lidhura me sëmundjet e lidhura me duhanin. Studimet shkencore kanë treguar se, me rritjen e temperaturës së duhanit, rriten edhe nivelet e kimikateve të dëmshme të formuara. Një cigare djeg duhanin në temperatura deri në 900°C. Kjo krijon nivele të larta të kimikateve të dëmshme në tymin e cigares.
Teknologjia e sotme po lejon zhvillimin e një game të re dhe novative të produkteve pa tym në formate të shumta, për shembull, produkte duhani me ngrohje dhe produkte të tjera që përmbajnë nikotinë të zhvilluara bazuar në parimin e ngrohjes në vend të djegies, pasi toksinat që lëshohen në cigaret kur ndodh djegia janë shkaktari kryesor i sëmundjeve të lidhura me duhanin. Studimet mbi duhanin pa tym, tregojnë se ato lëshojnë nivele më të ulëta toksinash në aerosolin e tyre (avullin) krahasuar me nivelet e toksinave në tymin e cigars dhe megjithëse nuk janë pa rrezik, është një alternativë më e mirë për pirjen e vazhdueshme të duhanit. Megjithatë, vendimi më i mirë që dikush mund të marrë është ta ndalojë plotësisht atë.
I pyetur nga Geek Room, nëse alternativat pa tym janë një rrugë drejt apo larg duhanpirjes, Massimo Andolina, President për rajonin e Evropës në PMI, u shpreh: “Rregullat tona për këtë janë të qarta: njerëzit që konsumojnë duhan duhet ta lënë atë dhe njerëzit që nuk pinë duhan nuk duhet ta fillojnë, kjo është në themelet e parimeve tona. Megjithatë, ne duhet të pranojmë se rreth një miliardë njerëz në mbarë botën pinë cigare dhe jo të gjithë e lënë. Dhe për këtë, PMI u ofron atyre që duan ose kanë nevojë të vazhdojnë të përdorin nikotinë, alternativa më të sigurta dhe më pak të dëmshme.
Cilat janë alternativat pa tym që PMI ofron?
Mund të mos e dini, por PMI ka menduar për alternativa pa tym qysh në vitet ’90 me produktet e para, shumë larg në dizajn nga ato që shohim sot, por gjithmonë me qëllim drejt një alternative më pak të dëmshme. Produkti i parë komercial u prezantua 9 vite më parë dhe që nga ai moment modeli IQOS është alternativa kryesore bazuar në parimin e ngrohjes së duhanit.
Gjatë vizitës sonë mësuam se PMI po planifikon prezantimin në Shqipëri të versionit më të ri të IQOS, i cili mban emrin ILUMA dhe sjell një teknologji të re të ngrohjes: atë me induksion në vend të tehut që gjendet në versionet IQOS Originals. Jo vetëm kaq, produkti ka gjithashtu të inkorporuar teknologji më intuitive dhe ju lejon të personalizoni paketimin e jashtëm për të dukur më unik, ose për të mos e ngatërruar me miqtë në tavolinë, siç ndodh zakonisht.
Një alternative tjetër është krijimi i një aerosoli duke ngrohur një formulë të lëngshme elektronike. PMI ka prezantuar gjithashtu disa pajisje me bateri, të njohura si vape ose cigare elektronike, IQOS VEEV që është tani prezent në tregje të zgjedhura.
PMI po prodhon gjithashtu qese nikotine që nuk përmbajnë duhan dhe janë bërë kryesisht nga nikotina dhe shije, të mbështjella në një qese celuloze të cilat vendosen midis dhëmbëve dhe faqes ose buzës së sipërme. Produktet si ZYN dhe SHIRO po gjejnë shumë përdorim në SHBA, Kanada dhe mbi të gjitha në Suedi, aty ku përdorimi i cigares ka rënë në 5%.
PMI synon që brenda vitit 2025 mbi 40 milionë duhanpirës të rritur në të gjithë botën të përdorin vetëm produkte pa tym, duke hequr dorë përfundimisht nga cigaria.
Sa po përkrahen alternativat pa tym?
Sot, PMI është prezente në 78 tregje në të gjithë botën me alternativat e saj pa tym, duke regjistruar mbi 25.5 milionë përdorues. Gjatë Technovation, kompania konfirmoi synimin se brenda vitit 2025, 50% e të ardhurave parashikohet të vijnë nga produktet pa tym.
Por cilat janë shtetet dhe moshat që po e përkrahin më shumë këtë teknologji? Massimo Andolina, President për rajonin e Evropës në PMI, tregon për Geek Room se: “Italia është një nga shtetet që po përdorin më shumë produktet pa tym duke regjistruar mbi 3 milionë përdorues, nga të cilët 2 milionë përdorin vetëm produkte pa tym. Shtete si Lituania, Hungaria, dhe Greqia kanë përkrahur këto alternativa më pak të dëmshme. Sa i përket moshave, kemi vënë re se grupmosha 25-40 ka numrin më të madh të përdoruesve që e përkrahin me shpejtësi si alternativë. Ndërsa mosha mbi 45 duket se po qëndron ende “në vëzhgim”. Mendoj se kjo ka të bëjë shumë me edukimin dhe faktin nëse janë apo jo të hapur për të pranuar novacionin si një mënyrë për të zgjidhur problemin.”
Cila është e ardhmja e produkteve IQOS?
Të shohësh nga afër “The Cube” ku punonin mbi 1000 persona ishte e vështirë që të mos mendonim se çfarë po përgatisin për vitet në vazhdim. Kështu që pyetjen tonë shumë “geek” ia drejtuam së pari Bertrand Bonvin, President i “HeatNotBurn”, i cili nuk na tha asgjë më shumë se sa “në godinë ishin duke përgatitur mbi 3 gjenerata teknologjie të produkteve pa tym”.
Po e ardhmja e afërt atëherë, çfarë na rezervon? Tommasso Di Giovanni, Zv. President Ndërkombëtar i Komunikimit në PMI, tha për Geek Room: “Dizajni, funksionaliteti dhe ergonomia do të vazhdojnë të përmirësohen. Ne mund të rrisim lidhjen me pajisjet e tjera, e cila është një nga gjërat kryesore që po shqyrtojmë. Për disa pajisje, ne tashmë po testojmë “njohjen e fytyrës” dhe mënyra të tjera njohjeje në mënyrë që jo-duhanpirësit dhe të rinjtë të mos kenë akses. Me disa cigare elektronike, ne po e testojmë këtë teknologji dhe po funksionon mirë.”
PMI po punon ndërkohë me partnerët për të zhvilluar aplikacione të cilat do të lidhin pajisjet IQOS me smartphone-in tuaj duke i dhënë përdoruesit një kontroll më të lartë në konsum. Kompania kujdesej shpesh të theksojë faktin se alternativat pa tym ofrojnë një zgjidhje shumë më pak të dëmshme, por gjithmonë zgjidhja më e mirë është lënia e duhanit.
