Albanian ICT Awards do të kurorëzojë edicionin e 11-të të saj ditën e premte më 26 maj 2023 në Mbrëmjen Gala e cila mbahet pranë Arka Art Hotel me pjesëmarrjen personaliteteve nga pushteti qendror dhe vendor, trupe diplomatike, bota akademike, e biznesit, medias dhe mbarë komunitetit të teknologjisë në mbarë hapësirën shqipfolëse.
Organizuar nga ALBICT dhe ICTSmedia, Albanian ICT Awards hyri në vitin e saj të 11-të më 10 Mars 2023 duke hapur aplikimet në gjashtë kategori. Çmimet, të cilat festojnë suksesin e pionierëve të teknologjisë që po përcaktojnë praktikat më të mira përmes inovacionit të aplikuar, tërhoqën 117 aplikime dhe mëse 150 kandidatë nga Shqipëria, Kosova, Maqedonia e Veriut dhe më gjerë.
Albanian ICT Awards hodhi hapin e saj të parë në dekadën e dytë në kërkim të inovacionit me rrënjë shqiptare në rajon dhe botë dhe përgjatë 10 viteve të fundit ka lënë gjurmën e saj duke influencuar kështu rolin që teknologjia ka për të luajtur në shoqërinë shqiptare.
U mbajtën më shumë se 23 takime gjer në mbyllje të aplikimeve më 30 Prill 2023 duke vizituar jo vetëm shkolla, universitete e qendra inovacioni por edhe komuna e bashki Shqiptare në rajon për të përhapur thirrjen në mbarë komunitetin e teknologjisë, inovacionit dhe sipërmarrjes.
50 kandidatë të cilët vinin me projekte dhe aplikacione fintech, e-commerce, EdTech, AI, machine learning e robotikë prezantuan përballë jurisë së Albanian ICT Awards. Si pjesë e procesit të vlerësimit dhe juria shqyrton aplikimet jo vetëm për qasjen novative të teknologjisë, por edhe për mënyrën se si ajo zbatohet për njerëzit, proceset, informacionin dhe teknologjinë, praktikat më të mira që ajo mbështet, ndikimin dhe vlerën e biznesit.
18 kandidatë do të shpërblehen në Mbrëmjen Gala të cilët synojnë të rrëmbejnë 6 çmimet e mëdha: ICT Inovacioni i Vitit, ICT Startupi i Vitit, ICT Diploma e Vitit, ICT Ylli në Ngritje deri në 16-vjeç, ICT Ylli në Ngritje 16-21 vjeç dhe Cyber Security Awards.
Duke bërë bashkë idetë dhe mendjet më të ndritura në Shqipëri, Ballkan dhe diasporë, Mbrëmja Gala e Albanian ICT Awards është një moment feste dhe frymëzimi për shqiptarët në teknologji, inovacion dh sipërmarrje.
Albanian ICT Awards ka vënë në dispozicion për publikun mundësi pjesëmarrje dhe donacioni si mbështetje dhe për të rritur numrin e çmimeve që do të shkojnë për finalistët e kësaj gare.
Duke blerë një prej biletave, kontribuoni në mënyrë të drejtpërdrejtë në rritjen e shpërblimeve për finalistët dhe fituesit e çmimeve të mëdha.
I pyetur nga Geek Room rreth këtij edicioni, Kushtrim Shala – Bashkëthemelues i Albanian ICT Awards – u shpreh:
“ICT Awards shënoi në edicionin e 11-të një rekord aplikimesh. Nuk kishte njohur më parë juria një sfidë më të madhe dhe përgjegjësi si kjo e këtij viti. Shqipëria spikat këtë vit si në cilësi dhe në numër në sipërmarrje të reja startup-e dhe inovacion. Ndërsa Kosova vazhdon të surprizojë në nivelin e ekspertizës teknike, siguri kibernetike dhe në prezantime.
Të rinjt dhe adoleshentët e sotëm kryesisht të moshave 17 – 25 vjeç na kanë surprizuar në zgjidhje të fokusuara në robotikë, EdTech, Fintech dhe Inteligjencë artificiale.
Sfida është përtej ICT Awards, është në fakt një sfidë e kohës, e shoqërisë, e medias, e donatorëve, akademisë dhe qeverisë.
Puna jonë konsiston në identifikimin e talentëve, ndërsa neve si shoqëri na duhet ti krijojmë kushtet për Shqipërinë tjetër, atë të mbajtjes së talentit brenda vendit, ti çmojmë dhe mbështesim në çdo rrethtanë.”
Për Albanian ICT Awards teknologjia, inovacioni dhe sipërmarrja janë një forcë përcaktuese e një mënyre të re të jetuarit dhe punuarit ku suksesi në to nuk mund të konsiderohet më si një opsion por një domosdoshmëri e imponuar në çdo sektor shoqëror dhe ekonomik të shqiptarëve kudo jetojnë.
Kjo ngjarje mbështetet mediatikisht nga Geek Room, Shqip.com, Lexo.al, Telegrafi, PCWorld dhe CIO.
