Pajisjet e palosshme nga Samsung nuk njihen si pajisjet me kamerat më high-end në kategorinë e smartphone-ve, ku zakonisht Samsung Galaxy Ultra është pajisja që ofron cilësinë më të lartë të fotografimit. Për fat të keq, nga informacionet më të reja kemi mësuar se kjo situatë nuk do të ndryshojë me Galaxy Z Fold 5 dhe Galaxy Z Flip 5.
Yogesh Brar ka publikuar në profilin e tij në Twitter specifikat për kamerat që do të gjenden në këto pajisje të palosshme, dhe mund të na duket sikur asgjë nuk ka ndryshuar nga viti i kaluar.
Samsung Galaxy Z Fold 5 do të përdorë një sistem kamerash me rezolucion të njejtë si Galaxy Z Fold 4: kamera kryesore 50MP, ajo ultrawide 12MP si dhe telephoto 10MP. Nga ana tjetër Galaxy Z Flip 5 do të ofrojë 2 kamera 12MP në pjesën e pasme, atë kryesore dhe ultrawide. Telephoto nuk do të jetë e pranishme, si zakonisht.
Megjithatë qarkullojnë raportime se smartphone-t do të përdorin sensorë të rinj imazhi, por është ende e paqartë nëse do të jenë vetëm kamerat kryesore apo të gjitha që do të përfitojnë nga ky ndryshim. Le të shpresojmë që sensorët të jenë më të mëdhenj për të përmirësuar cilësinë e fotografive në ambiente me pak dritë.
