Sony me shumë mundësi do të detyrohet nga Federal Trade Commission që të detajojë marrëveshjet e ekskluzivitetit të lojrave të ndryshme duke treguar shumën e paguar për të “bllokuar të drejtat” në mënyrë që ato të mos gjenden në shërbime si Xbox Game Pass.
FTC si fillim u përpoq të bllokonte marrëveshjen e blerjes së Activision Blizzard nga Microsoft dhe nisi një proçes zbulimi ligjor për detajet e kësaj marrëveshje. Mirëpo Kotaku ka vënë re se kryegjyqtari administrativ në FTC D. Michael Chappell ka pranuar tashmë kërkesën e Microsoft për të mësuar më tepër rreth marrëveshjeve të Sony mbi çështjen e ekskluzivitetit të lojrave.
Ky vendim i gjyqtarit vjen pasi Microsoft më parë ka akuzuar Sony se po paguan “për të bllokuar të drejtat e lojrave” duke ndaluar zhvilluesit që të shtojnë përmbajtjet e tyre në Xbox Game Pass.
Xbox është munduar të zbulojë këto detaje që në vitin 2012, mirëpo Chappell e cilësoi këtë kërkesë si “të tepërt”, dhe pranoi kërkesën e Sony për të limituar kohën e aksesimit të këtyre dokumenteve për në vitin 2019.
Publikimi i detajeve të ekskluzivitetit në publik ndodh rrallë herë, mirëpo ky rast që po trajtohet nga FTC mund të nxjerrë në dritë disa nga sekretet e industrisë së video-lojrave.
