Teknologjia fast-charging e Redmi sapo ka përmirësuar rekordet botërore të karikimit të shpejtë. Përmes një postimi në Weibo, dhe si pjesë e Mobile World Congress 2023 ku Geek Room dhe Neptun po marrin pjesë, prodhuesi i smartphone-ve prezanton teknologjinë e re 300W fast-charging që mund të karikojë një smartphone plotësisht në vetëm 5 minuta.
Nëse ju nuk e besoni këtë gjë, mjafton të klikoni këtu për të parë videon e publikuar në Weibo. Redmi lidh me karikuesen 300W një Note 12 Discovery Edition të modifikuar, i cili ka një bateri 4,100mAh në vend të asaj origjinale me 4,300mAh.
Kjo pajisje arrin të karikohet deri në 50% brenda 2 minutash, ndërkohë që kur kronometri shënon 5 minuta, smartphone-i ishte karikuar plotësisht. Me shumë mundësi ju ende nuk keni përfunduar mëngjesin ndërkohë që smatphone-i juaj është karikuar 100%.
Dhe pse Redmi e reklamon këtë karikuese si 300W, maksimumi i arritur gjatë proçesit të karikimit ishte 290W. Më parë kompania kishte arritur të karikonte Note 12 Discovery Edition për 9 minuta në 240W.
Kjo teknologji lë pas dhe atë 240W të prezantuar para një muaji nga Realme, që mund të karikonte plotësisht smartphone-in e ri GT Neo 5 në vetëm 10 minuta. Nuk dihet ende nëse kjo teknologji do të vijë së shpejti në smartphone-t që kompania prodhon.
