Së bashku me modelin flagship 1 V, Sony ka prezantuar dhe një pajisje midrange Xperia 10V. Ky është smartphone-i më i lehtë në botë që ka bateri me kapacitet 5,000mAh, pasi peshon vetëm 159 gram. Sony premton se bateria arrin të ruajë 80% të kapacitetit të saj dhe pas 3 vitesh përdorimi.
Sony Xperia 10V vjen me proçesorin Snapdragon 695, i cili shoqërohet nga 6GB RAM dhe 128GB memorie e brendshme. Megjithatë kjo memorie mund të shtohet përmes një microSD card.
Ekrani 1080p OLED vjen me madhësi 6.1”, por Sony tregon se është 1.5 herë më i ndritshëm se më parë. Për fat të keq ai ofron refresh rate vetëm 60Hz, e cila është disi e pazakontë tek smartphone-t e këtij niveli në vitin 2023. Për të arritur një peshë sa më të vogël, Sony nuk ka përdorur xham në pjesën e pasme, por plastikë.
Një tjetër përmirësim i pranishëm në këtë smartphone është kamera kryesore. Xperia 10 V vjen me një sensor 48MP 1/2.0” që ofron dhe stabilizim optik. Të pranishme janë dhe lentet telephoto 2x dhe ultrawide 8MP me kënd 120 gradë.
Ky smartphone është i çertifikuar për rezistencën ndaj ujit dhe pluhurave me gradën IP65/68, vjen me një portë 3.5mm për kufjet tuaja dhe suport për audion Hi-Res.
Në Evropë Xperia 10 V do të shitet për €449 duke nisur nga muaji qershor.
