Meta finalizoi blerjen e lojës VR të quajtur Population: One në 2021, e cila momentalisht shitet me një çmim prej $30 në Quest Store, por duke filluar nga data 9 mars kjo lojë do të ofrohet falas siç lajmërohet nga zhvilluesit BigBox VR.
Kjo lojë u lançua për herë të parë në tetor të vitit 2020 dhe u shndërrua në një lojë mjaft të njohur, me një vlerësim mbi 4 yje nga mbi 11,000 revieës të përdoruesve në Quest Store. Mirëpo duke e ofruar këtë lojë falas, Meta duket se dëshiron të shtojë më tepër vëmendjen rreth kësaj loje, duke tërhequr një audiencë akoma dhe më të gjërë.
Një strategji e tillë u provua dhe nga PUBG: Battlegrounds, që rezultoi një sukses i vërtetë. Në rast se popullariteti i lojës rritet shumë, Meta nuk do të ketë në dorë vetëm një lojë të rëndësishme battle-royale, por falë disa aspekteve të ngjashme me metaverse në sandbox mode kjo lojë mund të jetë më e suksesshme se Horizon Worlds, e cila po përballet me shumë vështirësi.
Megjithatë, jo gjithmonë strategjia e ofrimit të lojës falas ka funksionuar. Knockout City ishte një lojë që u ofrua falas 1 vit pas krijimit të saj, mirëpo u detyrua të ndalonte së funksionuari në qershor.
Të gjithë përdoruesit që e kanë blerë më parë Population: One dhe luajnë lojën para datës 9 mars mund të përfitojnë disa aksesorë brenda lojës, si përshembull veshja në formën e bananes.
