Fluturimi drejt hapësirës mund të jetë në të ardhmen një eksperiencë që mund të shijohet dhe nga persona të tjerë përveç milionerëve falë këtij startup-i japonez. Ky startup me emrin Iwaya Giken sapo ka prezantuar këtë javë planet për të lançuar një balonë të mbushur me helium që do të dërgojë njerëzit në hapësirë.
Keisuke Iwaya, CEO i Iwaya Giken tha se ka pëlqyer shumë shkencën dhe hapësirën që kur ka qenë fëmijë dhe se ishte inspiruar nga Dr. Emmet Brown në filmin Back to the Future. Gjatë kohës që ai ishte një student, lançoi në mënyrë të suksesshme disa balona të pajisura me kamera, duke shkrepur fotografi të Tokës nga lart. Që nga ajo kohë ai ka kryer dhe 80 lançime të tilla si dhe ka një liçensë për biznesin e tij të fotografimit hapësinor.
Iwaya dëshiron tashmë që ta çojë eksplorimin e hapësirës në një tjetër nivel, duke mundësuar fluturimin e personave të ndryshëm në këtë balonë me helium (pa patur nevojën për të paguar miliona dollarë për një biletë).
Kabina ka një hapësirë 150cm të gjerë ku mund të akomodohen dy persona, njëri që do të jetë piloti dhe tjetri pasagjeri. Më pas kjo kabinë do të ngrihet në fluturim përmes balonave të mbushura me helium, të cilat sipas kompanisë do të mund të ngjiten në një lartësi deri në 24km, pra në mesin e stratosferës.
Në këtë lartësi pasagjerët do të mund të shikojnë qartësisht kurbaturën e Tokës. Dritaret e mëdha të kabinës do të bëjnë të mundur që pasagjerët të shikojnë lirshëm pa asnjë pengesë këtë pamje të mahnitshme. Balona do të arrijë pikën më të lartë brenda 2 orësh, do të qëndrojë në këtë lartësi për 1 orë tjetër dhe më pas do të nisë fluturimin drejt sipërfaqjes.
Një udhëtim me balona me helum do të kushtojë rreth $180,000.
