Rezultatet që po prisnim prej kohësh janë zbuluar – punimi për 4 ditë në javë është me të vërtetë i suksesshëm, sipas studimeve të kryera. Për një periudhë 6 mujore duke nisur nga qershori i 2022, 61 kompani në Mbretërinë e Bashkuar ulën orët e punës së punonjësve me 20%, pa bërë ndryshime në rrogat e tyre.
Stafi që mori pjesë në këtë studim 6 mujor iu përgjigjën pyetjeve të studiuesve, duke treguar se 71% e tyre kishin nivele më të ulëta të lodhjes, ndërsa 39% thanë se ishin më pak të stresuar. Gjatë gjithë kësaj kohe drejteusit e kompanisë panë që produktiviteti në punë ishte i kënaqshëm, madje gjatë kësaj periudhe u regjistrua një rritje e fitimeve me 1.4%.
Joe Ryle, drejtues i fushatës 4 Day Week tregon se rezultatet shfaqin “një arritje mjaft e madhe” drejt finalizimit të idesë së punimit vetëm 4 ditë në javë. “Në sektorë të ndryshëm të ekonomisë, këto rezultate tregojnë se punimi për vetëm 4 ditë në javë funksionon.” shtoi ai.
Në 2021, nëpërmjet një sondazhi u zbulua se ¾ e punonjësve në zyra po konsideronin të linin punën e tyre pasi ndiheshin shumë të lodhur, nuk po arrinin të gjenin një balancë midis jetës së tyre personale dhe punës si dhe për shkak të ambienteve ”toksike” të punës.
Shkurtimi i orarit të punës në vetëm 4 ditë në javë ndihmon stafin të përkujdeset më tepër për fëmijët apo prindërit e tyre si dhe të gjejnë ndonjë hobi të ri gjatë fundjavës.
