Smartphone-t midrange të Samsung, Galaxy A5x dhe A7x kanë qenë shumë të kërkuar nga përdoruesit, por Galaxy A5x ka qenë gjithmonë modeli më i shitur. Për këtë arsye Samsung ka menduar që mos të prezantojë më një smartphone të ri në linjën A7x, duke bërë kështu që A73 të jetë modeli i fundit në llojin e tij.
Ky raportim vjen nga GalaxyClub. Deri më tani nuk ka patur asnjë lajm zyrtar mbi prodhimin e kësaj pajisje, ndërkohë që shumë detaje të tjera janë publikuar deri më tani rreth pajisjeve të tjera si A54 apo A14. Gjithashtu në publikimin e A73 u vu re se ky smartphone ishte i pranishëm në një numër më të vogël shtetesh se A72, gjë që tregonte rënien e rëndësisë së këtij smartphone-i.
Mirëpo mos prezantimi i një pajisje të re në serinë A7x dhe qetësia totale për sa i përket Galaxy S22 FE, krijon një “gropë” të madhe në shumëllojshmërinë e produkteve të kompanisë. Përdoruesit nuk do të kenë më produkte të “mesme” për të zgjedhur, pasi do të kalojnë nga linja A54 në S23 nga fillimi i vitit 2023.
Është ende e paqartë se si Samsung pret që të zgjidhë këtë problem, megjithatë kompania mund të bëjë disa ulje të fuqishme në smartphone-t e vitit të kaluar.
