Në 2014 Huawei prezantoi TalkBand B1, një orë smart e cila mund të përdorej gjithashtu si një kufje me Bluetooth. Pas prezantimit të disa gjeneratave të këtij produkti, Huawei ka vendosur të bëjë një avancim të mëtejshëm dhe të zhvillojë Huawei Watch Buds.
Nga vetë emri mund të kuptojmë se ora do të jetë multifunksionale. Njëkohësisht ora do të regjistrojë të dhënat mbi aktivitetin tonë fizik dhe do të mbajë kufjet me Bluetooth të integruara në trupin e saj. Huawei Watch Buds do të shërbejë dhe si një kasë karikimi për kufjet wireless.
Ne dimë se zakonisht jetëgjatësia e baterisë në orat smart nuk është shumë e mirë, dhe karikimi i kufjeve nga vetë ora mendohet ta shkurtojë akoma më tepër këtë jetëgjatësi. Megjithatë nuk është bërë ende e ditur se për sa kohë bateria do të zgjasë në një karikim të vetëm.
Ora duket më e madhe se orat e tjera smart, siç mund ta prisnit, për shkak të pranisë së kufjeve. Korniza mendohet të jetë prej çeliku, ndërkohë që rripat do të jenë prej lëkure. Ora do të fuqizohet nga HarmonyOS.
Pritet që prezantimi i plotë i kësaj pajisje të bëhet në muajin dhjetor, së bashku me një tjetër orë të dizenjuar për fëmijë.
