Një aplikim i ri për patentim nga Samsung na tregon se kompania po punon për të lëvizur stabilizimin e lenteve të kamerave në sensorët e tyre. Ky ndryshim i tillë mund të përmirësojë akoma dhe më tepër cilësinë e imazheve dhe mund të reduktojë blur-in e panevojshëm.
Për herë të parë një raportim i tillë qarkulloi në 2021, kur po publikoheshin leaks të reja rreth Galaxy S22, dhe mendohej që Samsung po e krijonte një sistem të tillë në bashkëpunim me Olympus.
Apple ishte prodhuesi i parë i smartphone-ve që përdori një stabilizim nga sensori, një teknikë që është shumë pranë mënyrës se si kamerat DSLR stabilizojnë një imazh në trupin e kameras, dhe jo vetëm në lente. Mirëpo për fat të keq përdorimi i kësaj teknologjie kërkon më tepër hapësirë, duke rritur madhësinë e ishullit të kamerave në pjesën e pasme, siç mund ta vini re në kalimin nga iPhone 11 Pro (nuk ka stabilizim në sensor) në iPhone 12 Pro (ka stabilizm në sensor).
Mendohet se Samsung mund ta përdorë këtë teknologji dhe në lenten telephoto, por në aplikimin për patentim nuk përmendet një gjë e tillë. Stabilizimi i sensorit telephoto mund të sillte një rritje të krahasueshme të cilësisë së imazheve të shkrepura.
