Starlink, rrjeti i satelitëve që mundëson shërbimin e internetit në vende të ndryshme të botës, ka qenë tepër i rëndësishëm në favor të Ukrainës në luftën kundër Rusisë. Një gjë e tillë është bërë e ditur dhe nga një zyrtar i SHBA.
Që nga dërgimi i koordinatave për sulmet e artilerisë kundër Rusisë deri në transmetimin drejtpërdrejtë të deklaratave të presidentit të Ukrainës, Volodymyr Zelensky, gjenerali i brigadadës Steven Butow tregoi për Politico se shërbimet Starlink të SpaceX kanë qenë vendimtare për ushtrinë ukrainase.
“Impakti strategjik është shkatërrimi i plotë i fushatës informuese të Putin. Ai asnjëherë, deri më sot, nuk ka arritur të heshtë Zelensky-n” shtoi Burrow.
Javën e kaluar, Zelensky falenderoi shërbimin satelitor që lejoi Ukrainën të mbetej në kontakt me pjesën tjetër të botës. “Na ka ndihmuar shumë, në momente të ndryshme gjatë bllokadës në qytetet, fshatërat dhe territoret e pushtuara.” tha presidenti gjatë një interviste me Wired.
Starlink ka qenë gjithashtu shumë i rëndësishëm, pasi i mundësoi Ukrainës të rimerrte veten pas sulmeve kibernetike të Rusisë. Në 24 shkurt, një orë para se Rusia të niste sulmin e saj drejt Ukrainës, u lançua një sulm mbi ofruesin satelitor që përdorej nga ushtria ukrainase.
Dy ditë pas këtij sulmi, Elon Musk nisi të dorëzonte më tepër pajisje të nevojshme për lidhjen në internetin Starlink, dhe deri para 5 ditësh, SpaceX ka dorëzuar rreth 15,000 komplete Starlink në Ukrainë.
