Në një njoftim të brendshëm të zbuluar nga Bloomberg Tuesday, tregohet se Apple ka vendosur të shtyjë vendimin e marrë për rikthimin e punonjësve në zyra në një orar hibrid, i cili do të fillonte zbatimin nga data 23 maj.
Arsyeja e përmendur në këtë njoftim është “rritja e rasteve pozitive me COVID-19”, gjë që do të bëjë të mundur shtyrjen e këtij vendimi deri në një lajmërim të dytë. Megjithatë ky lajmërim nuk mund të jetë kaq rastësor.
Vetëm pak ditë më parë Ian Goodfellow, ish-drejtuesi i Machine Learning në Apple u largua nga kompania, duke siguruar një vend pune në DeepMind të Alphabet (kompania mëmë e Google) pasi ai ishte irrituar nga vendimi për rikthimin në zyra të Apple. “Unë besoj se ofrimi i më tepër fleksibiliteti do të ishte vendimi më i mirë për ekipin tim.” tregoi ai në një deklaratë.
Kjo është një goditje e rëndësishme për kompaninë, pasi Apple nuk ka arritur dot të bindë punonjësit e saj për t’u rikthyer në zyra, madje shumë prej tyre janë të gatshëm të largohen nga puna nëse nuk iu mundësohet punimi nga shtëpia.
Nga ana tjetër një grup punonjësish në Apple shkruajtën një letër publike për drejtuesit e kompanisë ku kritikonin qartë politikat e reja të kompanisë. “Ne nuk kërkojmë që të gjithë punonjësit të detyrohen të punojnë nga shtëpia. Ne duam që ju të na ofroni mundësi zgjedhjeje. Mjaft na trajtuat si fëmijë shkolle që duhet të drejtohen se kur dhe ku duhet të bëhen detyrat e shtëpisë.” shkruajtën punonjësit.
