Nëse ju jeni një përdoures i WhatsApp, me shumë mundësi ju jeni përfshirë ndonjëherë në një grup ku nuk keni patur dëshirë të merrni pjesë. Zakonisht këto grupe krijohen nga miqtë apo familjarët tuaj, dhe ju “detyroheni” të qëndroni në këtë grup, pasi nëse largoheni të gjithë anëtarët e grupit do të njoftohen.
Me sa duket WhatsApp ka vendosur të lehtësojë disi këtë ndjesi për përdoruesit e saj. Sipas WABetaInfo, platforma po punon për të sjellë një shërbim të ri i cili do të lejojë përdoruesit të largohen nga grupet pa zhurmë. Një screenshot i këtij shërbimi që pritet të vijë së shpejti tregon se vetëm admini i grupit të WhatsApp do të njoftohet se ju jeni larguar nga ky grup.
Aktualisht, WhatsApp njofton të gjithë pjesëtarët e grupit nëse njëri prej tyre largohet. Me shërbimin e ri, ju do të “ofendoni” vetëm adminin e grupit, dhe jo të gjithë anëtarët duke u larguar nga ky grup.
WABetaInfo raporton se shërbimi është në zhvillim e sipër dhe së shpejti do të vijë në të gjithë versionet beta të aplikacionit për iOS dhe Android.
