Prej disa vitesh shkencëtarët po punojnë gjithnjë e më tepër për të krijuar mjete të reja fluturuese, të cilat do të ishin një zgjidhje e vërtetë e trafikut të rënduar tokësor.
Duke parë të gjitha këto përpjekje është bërë e mundur që të hapet vertiporti i parë në botë në Coventry, Angli i quajtur Air-One. Ky vertiport do të funksionojë si një qendër për uljen dhe ngritjen në fluturim të mjeteve që lëvizin vertikalisht (eVTOL) si dronët, mirëpo këtu do të përfshihen dhe makinat fluturuese.
“Hapja e Air-One shënon një moment të veçantë – nisja e një gjenerate të re transportimi me zero emëtime midis qyteteve që do t’i bëjë njerëzit më të shëndetshëm, më të lumtur dhe më të lidhur se kurrë më parë.” tha Ricky Sandhu, themeluesi dhe CEO i Urban-Air Port.
“Makinat kanë rrugë. Treni ka shinat. Aeroplanët kanë aeroporte. Tashëm eVTOL do të kenë Urban-Air Port.” shtoi ai. Vendi i parë në Coventry u përzgjodh pasi ndodhet në një pikë mjaft strategjike në zemër të Mbretërisë së Bashkuar, vetëm disa orë larg nga shumica e qyteteve të vendit. Megjithatë, Urban-Air Port ka një plan ambicioz për krijimin e më tepër se 200 vertiportëve në të gjithë botën deri në vitin 2027.
