Një banor i Kalifornisë Jugore, Lawrence Klein, ka paditur Microsoft për vendimin e kompanisë që të ndalojë mbështetjen për Windows 10 më 14 tetor 2025. Edhe pse Windows 11 u prezantua gati 4 vite më parë, rreth 43% e përdoruesve të Windows ende përdorin versionin e vjetër. Pas kësaj date, Windows 10 nuk do të marrë më përditësime sigurie apo funksione të reja, megjithëse pajisjet do të vazhdojnë të funksionojnë.
Klein zotëron dy laptopë me Windows 10 dhe pretendon se këto pajisje do të bëhen të papërdorshme për shkak të mungesës së përditësimeve. Ai akuzon Microsoft-in se po detyron klientët të blejnë pajisje të reja për të ruajtur dominimin në tregun e inteligjencës artificiale gjenerative. Windows 11 vjen me paketën e AI të Microsoft, Copilot, që funksionon më mirë me pajisje që kanë “neural processing unit” – harduer që mungon në kompjuterët e vjetër.
Padia thekson se miliona përdorues, përfshirë biznese që ruajnë të dhëna të ndjeshme, do të jenë më të ekspozuar ndaj sulmeve kibernetike. Microsoft e ofron kalimin në Windows 11 falas, por rreth 240 milionë kompjuterë nuk kanë specifikat e duhura. Për ta, ekziston opsioni i përditësimeve të zgjeruara deri më 2028, me çmime që nisin nga 30 dollarë në vit për individë dhe 61 dollarë për biznese, duke u rritur deri në 244 dollarë në vitin e tretë.
Sipas një analisti, ky tranzicion mund të çojë në blerjen e miliona pajisjeve të reja dhe hedhjen në landfill të 240 milionë PC-ve – një grumbull që do të arrinte 600 km mbi lartësinë e Hënës. Klein kërkon që gjykata të detyrojë Microsoft-in të mbështesë Windows 10 falas derisa përdoruesit e tij të bien nën 10% të totalit. Ai nuk kërkon dëmshpërblim personal, përveç mbulimit të shpenzimeve ligjore.
