Digital Chat Station ka publikuar ditën e djeshme një informacion të ri i cili lidhet sensorin e ri të kamerave nga Sony i cili thyen rekordet për sa i përket madhësisë.
Sipas tij kjo kompani ka nisur tashmë testimet për sensorin Sony Exmor IMX800, me rezolucion 50MP dhe me madhësi 1/1.1 inç. Në këtë mënyrë ky sensor do të jetë më i madhi i krijuar ndonjëherë për kamerat e smartphone-ve, duke lënë pas sensorin GN2 të Samsung.
Sa më i madh të jetë sensori, aq më tepër ndriçim mund të fusë brenda, gjë që sjell rritjen e kualitetit të fotografive. Besohet se për herë të parë ky sensor do të përdoret në Xiaomi 12 Ultra. Mi 11 Ultra i vitit të kaluar përdorte pikërisht sensorin GN2 nga Samsung.
Sigurisht, ka dhe shumë faktorë të tjerë përveç sensorit të kamerave që ndihmojnë në prodhimin e fotografive me kualitet të lartë. Mjafton të përmendim se Google Pixel arrinte me një sensor vetëm 12MP të shkrepte fotografitë më të bukura për kohën, falë algoritmeve të Google.
Aktualisht Sony dhe Samsung janë 2 prodhuesit kryesorë të sensorëve në industri.
