Samsung ka vendosur që të lejë pas S22 FE që pritej të prezantohej gjatë vitit të kaluar, pasi u përball me shumë sfida të ndryshme si përshembull mungesa e proçesorëve në treg apo rritja e kërkesës për Samsung Galaxy S22 Ultra. Megjithatë një raportim i ri nga The Elec tregon se seria Fan Edition mund të rikthehet në 2023 me Samsung Galaxy S23 FE që mund të lançohet në muajt gusht-shtator të këtij viti.
Kjo seri mori një popullaritet mjaft të madh me Galaxy S20 FE në 2020, ku arriti të shiste mbi 10 milionë pajisje të tilla. Ishte shumë e vështirë që Samsung të arrinte një sukses të tillë sërisht, dhe S21 FE nuk arriti dot të performonte aq mirë. Më pas kompania po vlerësonte mundësitë nëse duhet të prezantonte sërisht ndonjë smartphone nga kjo seri.
Bazuar në raportimet e reja të cilat tregojnë se Samsung nuk do të prezantojë Galaxy A74 këtë vit, mund të themi se Samsung duket se po fokusohet për të sjellë S23 FE në më tepër tregje.
Pritet që S23 FE i ri të pajiset me proçesorin e personalizuar të Samsung, Snapdragon 8 Gen 2 for Samsung ose me proçesorin më të mirë të 2022, Snapdragon 8+ Gen 1.
