Apple thuhet se përdori 5 aeroplanë mallrash për të transportuar iPhone nga fabrikat e saj indiane në SHBA, në një përpjekje për të shmangur tarifat e Donald Trump.
Kompania e teknologjisë ka dërguar 600 ton iPhone, ose deri në 1.5 milion celularë, në SHBA nga India që nga marsi, pasi rriti prodhimin në fabrikat e saj në vend. Mirëpo tashmë tarifat e parashikuara nga Trump prej 26% për importet indiane janë pezulluar për rreth tre muaj pasi presidenti amerikan vendosi për një pauzë 90-ditore, por ai ka njoftuar se tarifat për mallrat nga Kina – ku Apple prodhon shumicën e iPhone-ve të saj – do t’i nënshtrohen një takse prej të paktën 145%.
Sipas zyrtarëve të lartë indianë të cituar në raport, Apple fluturoi pesë aeroplanë plot me iPhone dhe produkte të tjera nga India dhe Kina “në vetëm 3 ditë gjatë javës së fundit të marsit“. “Fabrikat në Indi dhe Kinë dhe vende të tjera kyçe kishin dërguar produkte në SHBA në pritje të tarifave më të larta”, tha një burim për The Times of India.
Duke grumbulluar sa më shumë inventar në Shtetet e Bashkuara, Apple mund të vonojë ndikimin e tarifave. Është e paqartë se sa inventar Apple ka siguruar deri tani në SHBA.
Analistët kanë paralajmëruar se lëvizja e prodhimit të iPhone në SHBA do të ishte tepër e shtrenjtë për shkak të faktorëve të tillë si kostoja e pagesës së qindra mijëra punëtorëve.
