Dr. Isaac Kohane, një mjek dhe computer scientist në Harvard, bashkëpunoi me 2 kolegë të tij për të testuar GPT-4 me një qëllim kryesor: për të shikuar se si modeli më i ri i inteligjencës artificiale nga OpenAI performon në fushën e mjekësisë.
“Unë isha shumë i habitur nga rezultatet, të cilat ishin më të mira se shumë nga doktorët që unë kam parë.” tregon Kohane në librin më të ri “The AI Revolution in Medicine”.
Në këtë libër ai tregon se GPT-4 i përgjigjej saktë pyetjeve në provimin e liçensimit të mjekëve në SHBA 90% të rasteve. Kjo gjë tregon se ky model është shumë më i përparuar se modelet GPT-3 dhe GPT-3.5, por në disa raste kjo inteligjencë artificiale është dhe më e saktë se disa doktorë të liçensuar.
GPT-4 jo vetëm që është një zbulues faktesh shumë i saktë, por është dhe në gjendje të përkthejë informacione teknike në gjuhë lehtësisht të kuptueshme nga një nxënës i klasës së 6-të. Ky sistem mundet që t’i japë doktorëve sugjerime më të mira në mënyrën e diskutimit me pacientët rreth sëmundjes së tyre, për të qenë sa më i qartë. Gjithashtu raportimet e gjata mund të përmblidhen në disa pika kyçe nga GPT-4.
Nëpërmjet dhënies së informacioneve të duhura, sistemi AI ishte në gjendje që të diagnostikonte saktësisht një sëmundje të rrallë të quajtur hiperplazia adrenal kongenitale, që gjendet në 1/100,000 pacientë.
