OpenAI nuk do të kërkojë më një llogari për të përdorur ChatGPT, platformën falas të AI të kompanisë. Sidoqoftë, kjo vlen vetëm për ChatGPT, pasi produktet e tjera OpenAI, si DALL-E 3, kushtojnë para për t’u përdorur dhe do të kërkojnë ende një llogari për t’u aksesuar.
“Ne po e shpërndajmë këtë gradualisht, me synimin për ta bërë AI të aksesueshme për këdo që është kurioz për aftësitë e saj,” tha OpenAI në një postim në blog. Që kur ChatGPT u prezantua për herë të parë në fund të 2022, përdoruesve të interesuar u është dashur të regjistrohen me një llogari në OpenAI. Chatbot rezultoi një sukses i vërtetë, dhe kjo gjë e shndërroi ChatGPT në një nga shërbimet me rritjen më të shpejtë ndonjëherë. Kompania më pas shtoi abonime me pagesë për të aksesuar produkte si DALL-E 3 dhe modele më të avancuara. Përdoruesit do të kenë nevojë për një llogari për të ruajtur dhe rishikuar historikun e bisedave, për të ndarë bisedat dhe për të pasur biseda me zë.
OpenAI ka thënë se më shumë se 100 milionë njerëz në 185 vende përdorin ChatGPT çdo javë. Gjurmuesi i trafikut SimilarWeb zbuloi se ChatGPT, me rreth 1.6 miliardë vizitorë në shkurt, mbetet chatbot-i më i vizituar i AI, edhe pse Gemini i Google ka filluar të përdoret gjithnjë e më tepër.
Sidoqoftë, trafiku i tij është ulur pak nga nivelet e larta të arritura në maj 2023, kur numri i vizitave arriti në 1.8 miliardë. OpenAI tha se prezantoi “mbrojtje shtesë të përmbajtjes për këtë përvojë“, duke përfshirë bllokimin e kërkesave në një gamë më të gjerë kategorish, por nuk shpjegoi më shumë se cilat janë këto kategori. Opsioni për të hequr dorë nga trajnimi i modelit do të jetë ende i disponueshëm, edhe për ata që nuk kanë llogari.
