Njerëzit mund të krijojnë dobësi në sisteme jo vetëm në software po edhe në hardware. Për të luftuar këtë problem, studiuesit gjermanë kanë zhvilluar një metodë të re kërkimi që zbulon manipulimet e bëra në mikroçipa. Shumicën e rasteve këto manipulime janë dizenjuar për të qenë sa më pak të dukshme, prandaj mund të mos zbulohen nga prodhuesit.
Hardware Trojans janë modifikime të bëra në qarkun e një çipi elektronik që i lejon agresorët të kontrollojnë aplikacione teknike. Sulme të tilla mund të sjellin dëme të mëdha, duke shkaktuar probleme dhe në infrastrukturën e telekomunikacionit.
Pjesë e planit të studiuesve për kontrollimin e këtyre modifikimeve janë përdorimi i mikroskopëve elektronikë si dhe algoritmeve zbuluese. Për të testuar metodën e tyre të zbulimit, studiuesit u ndanë në dy ekipe. Ekipi i kuq kishte si detyrë të bënte manipulime të vogla në 4 gjeneratat moderne të teknologjisë CMOS, 28nm, 40nm, 65nm dhe 90nm. Ekipi blu kishte si detyrë të zbulonte këto manipulime të bëra përmes mikroskopit elektronik dhe algoritmit.
Algoritmi e ndihmoi ekipin blu që të zbulonte manipulimet e bëra në 37 nga 40 raste, duke patur një sukses prej 92.5%. Modifikimet e bëra në çipin 28nm ishin më të vështirat për t’u zbuluar, dhe ekipi tashmë po punon për të përmirësuar algoritmin në këtë drejtim.
Nëse kjo teknikë do të implementohet nga prodhuesit e çipave, mund të rritet siguria e pajisjeve që përdorin këto çipa, duke zbuluar mangësitë që në hapat e para të prodhimit.
