Startup-i amerikan Inversion Space, themeluar në vitin 2021, po zhvillon një sistem të ri shpërndarjeje nga hapësira drejt Tokës. Kompania synon të krijojë një konstelacion anijesh të ripërdorshme në orbitë të ulët që mund të dërgojnë ngarkesa në çdo vend të botës brenda një ore. Projekti i tyre më i fundit është Arc, një hibrid ndërmjet kapsulës dhe aeroplanit hapësinor, me gjatësi 2.4 metra e lartësi 2.4 metra, i aftë të transportojë deri në 225 kilogramë ngarkesë.
Arc do të qëndrojë në orbitë për deri në 5 vjet dhe, kur të nevojitet, do të kthehet në mënyrë autonome në Tokë përmes një motori deorbital dhe një parashute të manovrueshme. E ndërtuar për të përballuar shpejtësi hipersonike, anijet mund të kryejnë manovra, të bashkohen me anije të tjera në orbitë dhe të kryejnë dërgesa urgjente në zona të paarritshme ose me infrastrukturë të kufizuar.
Qëllimi kryesor i Inversion është krijimi i një rrjeti logjistik hapësinor që do të përdoret veçanërisht nga ushtria amerikane. Kompania thekson se Arc mund të “riformësojë përgatitjen mbrojtëse” duke lejuar transportimin e ngarkesave kritike në çdo pikë të globit në më pak se 60 minuta — një avantazh i madh për operacionet emergjente dhe mjediset pa infrastrukturë tokësore.
Në janar 2025, Inversion kreu fluturimin e parë demonstrues me anijen Ray, si pjesë e misionit SpaceX Transporter-12. Megjithëse një defekt në sistemin e shtytjes pengoi ri-hyrjen në atmosferë, misioni konsiderohet i suksesshëm pasi testoi me sukses shumicën e teknologjive të reja të zhvilluara nga ekipi i vogël prej vetëm 25 inxhinierësh.
