Snap prezantoi zyrtarisht syzet e reja Specs, me një çmim marramendës prej 2,195 dollarësh, duke i pozicionuar si hapin e radhës drejt asaj që kompania e quan “kompjuterizimi i botës reale”. Në një intervistë për CNBC, CEO i Snap, Evan Spiegel, tha se Specs janë fryt i më shumë se 12 viteve pune dhe synojnë ta bëjnë teknologjinë më “njerëzore”, duke i larguar përdoruesit nga ekranet e telefonave. Ironikisht, ndërsa fliste për lodhjen nga ekranet, reflektimi i dritës në lentet e syzeve zbulonte qartë ekranin e fshehur që ndodhet mes tij dhe bashkëbiseduesit.
Problemi kryesore mbetet dizajni. Me korniza të trasha, forma të mëdha dhe këndore, ato duken më shumë si një produkt mode sesa një pajisje për përdorim të përditshëm. Snap po i shet hapur si një pajisje luksoze duke përdorur një fushatë globale të fotografuar nga Steven Meisel dhe fytyra të njohura si Kaia Gerber, Hoyeon, Jimmy Butler, Jack Harlow dhe Imogen Heap. Por historia e teknologjisë “wearable” na ka mësuar se sa më i guximshëm dizajni, aq më pak njerëz ndihen rehat ta mbajnë.
Shembujt nuk mungojnë. Google Glass dështoi pjesërisht sepse dukej tepër futurist dhe i çuditshëm. Edhe Meta Ray-Ban u kritikuan fillimisht për trashësinë e tyre, derisa dizajni u bë më i zakonshëm. Prandaj nuk është rastësi që projektet e ardhshme Android XR po bashkëpunojnë me marka si Warby Parker dhe Gentle Monster, për të balancuar teknologjinë me estetikën.
Specs nuk e ofrojnë këtë kompromis. Me peshë 132–136 gramë, ato janë pothuajse dyfishi i syzeve inteligjente aktuale dhe shumë larg peshës ideale për rehati afatgjatë. Për shumicën e njerëzve, sidomos ata që mbajnë syze me numër, kjo i bën Specs një aksesor dytësor jashtëzakonisht të shtrenjtë.
