Me përparimin e teknologjisë shumë shtete të Evropës, përveç kartave fizike të identitetit, i kanë pajisur qytetarët dhe me një letërnjoftim digjital, i cili mund të aksesohet nga pajisjet inteligjente përmes aplikacioneve përkatëse.
Një ndryshim i tillë pritet të vijë dhe në Shqipëri së shpejti, siç bëhet i ditur nga projektligji i ri i publikuar, që fillimisht është propozuar nga Ministria e Brendshme. Ky projektligj parashikon që të gjithë qytetarët shqiptarë të pajisen me një kartë identiteti digjitale në mënyrë që identifikimi i tyre të arrihet në një mënyrë sa më të lehtë të mundur.
Më poshtë do të mund të shikojmë dhe ndryshimet e paraqitura për konsultim publik në projektligjin për letërnjoftimin elektronik, me kostot e këtyre ndryshimeve që do të parashikohen në vendimin e Këshillit të Ministrave.
“Pajisja me letërnjoftim digjital (e-letërnjoftim) ka për qëllim përmirësimin dhe standardizimin e mënyrave të identifikimit të qytetarëve në ambientin digjital.” lexohet në njoftimin për konsultim publik.
Për sa kohë Shqipëria synon që së shpejti të jetë pjesë e Bashkimit Evropian, ky projektligj është në përputhje me ligjet e BE të cilat zbatuan një rregullore të re në vitin 2024 për identifikimin digjital.
