I frymëzuar nga filmat “Mission Impossible”, shkencëtari Lee Seok Woo nga Shkolla e Inxhinierisë Elektrike dhe Elektronike të Universitetit Teknologjik Nanyang ka shpikur një bateri novatore për lente kontakti inteligjente, dhe ne besojmë se ky aplikim do të bëjë që lentet inteligjente të zëvëndësojnë teknologjinë AR apo VR.
Dizajn inovativ i baterisë
Ekspertiza e Lee në komponentët e baterive hodhi themelet për përpjekjen e tij në zhvillimin e kësaj teknologjie. Ai pranoi se lentet e kontaktit inteligjente do të kërkonin bateri të sigurta dhe kompakte, thelbësore për zhvillimin e tyre. Duke pasur parasysh se lentet e kontaktit janë jashtëzakonisht të holla, me vetëm 0,5 mm, bateritë duhej të ishin po aq të holla dhe fleksibël për të siguruar rehati të përdoruesit. Lee dhe ekipi i tij patën sukses në krijimin e një baterie që është rreth 0.2 mm e trashë, afërsisht dyfishi i trashësisë së një floku të njeriut.
Bateri e sigurt
Bateria e zhvilluar rishtazi furnizohet me energji duke përdorur një përzierje të sigurt saline në vend të baterive tradicionale litium-jon, të cilat përmbajnë materiale që marrin flakë.
Kjo bateri inovative mund të karikohet nëpërmjet metodave konvencionale me tel ose një metode kimike që përfshin glukozën. Kur bateria zhytet në një tretësirë të kripur, glukoza reagon me jonet e natriumit dhe klorurit për ta karikuar atë. Pas tetë orësh karikimi kimik, bateria mund të arrijë 80% të kapacitetit të saj të plotë, duke siguruar energji për disa orë përdorim të përditshëm.
Karikimi përmes lotëve
Një aftësi e veçantë e kësaj baterie është ajo për t’u karikuar nga lotët. Lotët përmbajnë glukozë, që do të thotë se ndërsa mban lentet e kontaktit, lotët e një përdoruesi mund të ndihmojnë në ngarkimin e baterisë. “Nëse qani më shumë, atëherë mund ta ngarkoni baterinë tuaj më shumë,” vuri në dukje Lee me humor.
Aktualisht, kapaciteti dhe voltazhi i baterisë janë ende mjaft të ulëta, duke prodhuar një tension prej afërsisht 0.3V – 0.6V. Për krahasim, një bateri standarde AA ka një tension prej 1.5 V. Kjo nuk është ende e mjaftueshme për të fuqizuar ruajtjen e të dhënave ose lidhjet e internetit. Megjithatë, ekipi po punon në mënyrë aktive për të përmirësuar specifikimet e baterisë.
Aplikimet e mundshme në kujdesin shëndetësor
Lee sheh potencial të rëndësishëm për këto lente kontakti inteligjente në kujdesin shëndetësor, veçanërisht për pacientët me diabet. Ekipi po eksploron se si lentet e kontaktit mund të zbulojnë nivelet e glukozës gjatë përdorimit, duke ofruar një metodë të vazhdueshme dhe jo invazive për monitorimin e niveleve të sheqerit në gjak.
Kostot
Pavarësisht nga aplikimet premtuese, Lee thekson rëndësinë e mbajtjes së kostove të ulëta. Ai beson se sapo bateria të arrijë komercializimin serioz, duhet të kushtojë vetëm disa dollarë, duke e bërë atë të aksesueshme dhe të përballueshme për përdorim të gjerë.
