Pas njoftimit gjatë I/O 2023, Google do të fillojë të ofrojë aftësinë për disa pajisje Android për të zbuluar dhe paralajmëruar pronarët e tyre nëse gjurmohen nga një gjurmues i padëshiruar Bluetooth. Gjurmuesit Bluetooth si Apple AirTags janë të shkëlqyeshëm për t’i ndihmuar pronarët të dijnë se ku i kanë harruar çelësat e tyre apo sende të tjera. Por, për fat të keq, ka një grup njerëzish që duan të abuzojnë me këto mjete dhe t’i përdorin ato për qëllime të këqija, si përshembull gjurmimi i njerëzve pa dijeninë e tyre.
Për të ndihmuar në luftimin kundër këtij fenomeni, duke filluar nga ky muaj, përdoruesit e Android 6.0+ do të ndihmohen nga pajisjet e tyre për të zbuluar gjurmuesit e padëshiruar Bluetooth.
Linja e parë e mbrojtjes do të përbëhet nga pajisjet Android që skanojnë në heshtje për gjurmuesit që duket se po ndjekin përdoruesin. Nëse dyshohet për gjurmim, përdoruesit do të marrin një njoftim dhe do të jenë në gjendje të mësojnë më shumë rreth gjurmuesit si dhe vendndodhjen e tij në një hartë.
Për të ndihmuar në gjetjen e gjurmuesit, personi që gjurmohet do të jetë në gjendje ta bëjë gjurmuesin të luajë një tingull dhe kjo do të bëhet pa njoftuar pronarin e gjurmuesit se është bërë një kërkesë. Nëse gjendet një gjurmues, linja e dytë e mbrojtjes do t’i ndihmojë përdoruesit të kuptojnë se kujt i përket. Mbajtja e gjurmuesit pranë pajisjes Android do të shfaqë numrin e tij serial ose informacione për pronarin e pajisjes, si p.sh. katër shifrat e fundit të numrit të telefonit të lidhur me pajisjen.
Informacioni për çaktivizimin e gjurmuesit – për AirTag thjesht përfshin heqjen e baterisë – do të sigurohet gjithashtu. Sinjalizimet e panjohura të gjurmuesve në Android aktualisht funksionojnë vetëm me Apple AirTags, por Google dëshiron të shohë zgjerimin e këtij shërbimi dhe po punon me prodhues të tjerë gjurmuesish për të zgjeruar këtë mbrojtje kundër gjurmuesve Bluetooth me qëllime të këqija.
