Më në fund Meta gjeti një blerës të interesuar për Giphy, motorin e kërkimit të GIFs, i cili u ble për $400 milionë 3 vite më parë.
Shutterstock lajmëroi ditën e djeshme se kishte arritur një marrëveshje me Meta për blerjen e Giphy në një transaksion që konsiston në pagesën e $53 milionë, pra Meta ka rekuperuar vetëm 13% të parave që shpenzoi për Giphy. Shutterstock tregon se marrëveshja mund të mbyllet në fund të muajit të ardhshëm, dhe Meta do të ketë akses të pandërprerë në përmbajtjet e Giphy.
Ky lajmërim vjen disa muaj pasi autoriteti antitrust i Mbretërisë së Bashkuar i dha një urdhër përfundimtar Meta që të shiste Giphy, pasi kjo blerje cënonte konkurencën dinamike në treg. The Competition and Markets Authority kishte urdhëruar këtë shitje që në nëntor të vitit 2021, por proçeset e apelimit të vendimit bënë që urdhri të shtyhej deri më tani.
Në tetor të vitit të kaluar Meta konfirmoi se nuk do të apelonte më tepër këto vendime dhe se do të pranonte që të shiste Giphy drejt një kompanie të interesuar.
Duket se kjo marrëveshje ka ardhur fiks në kohën e duhur për Shutterstock, e cila arriti të blinte kompaninë më të madhe të GIFs për një çmim shumë të favorshëm.
