Roboti i parë humanoid me inteligjencë artificiale i Rusisë, i quajtur Aldol, pati një debutim të dështuar dhe të sikletshëm në një ngjarje teknologjike në Moskë, duke u përplasur me fytyrë në skenë vetëm pak sekonda pasi u prezantua. Pamjet filmike treguan robotin duke ecur drejt publikut nën kolonën zanore të “Gonna Fly Noë” nga filmi Rocky. Por në tentativën për t’i bërë një përshëndetje audiencës, ai humbi ekuilibrin dhe u rrëzua.
Zhvilluesit u përpoqën ta ngrinin me nxitim, e më pas tentuan ta mbulonin me një pëlhurë të zezë, e cila përfundoi duke u ngatërruar me robotin që vazhdonte të lëvizte në mënyrë të çrregullt. Aldol u prezantua nga kompania ruse Idol në një forum të New Technology Coalition, një shoqatë që synon zhvillimin e robotëve humanoidë dhe që përfshin kompani si Promobot, Double U Expo dhe Robot Corporation. Ngjarja synonte të demonstronte përparimin e Rusisë në AI dhe robotikë, por incidenti nxori në pah mangësitë serioze të sektorit.
Sipas zhvilluesve, Aldol ishte ndërtuar për të kryer tre funksione bazë njerëzore: ecjen në dy këmbë, manipulimin e objekteve dhe komunikimin. Megjithatë, paraqitja e tij e parë tregoi më shumë problemet e Rusisë se sa arritjet. Që nga fillimi i pushtimit të Ukrainës, industria e robotikës në vend ka ngecur për shkak të varësisë nga prodhuesit e huaj, të cilët u larguan pas fillimit të luftës. Rusia instaloi vetëm 2,100 komplekse robotike në vitin 2023, krahasuar me 25,000 në Gjermani dhe 300,000 në Kinë. Sanksionet, shpërngulja e talenteve dhe mungesa e inovacionit kanë përkeqësuar situatën.
Putin ka pranuar se adoptimi i robotikës në industrinë ruse është “për fat të keq shumë i ulët”. Ndërkohë, drejtori i Idol, Vladimir Vitukhin, justifikoi rrëzimin e Aldol me probleme ndriçimi dhe kalibrimi, duke thënë se gabime të tilla shndërrohen në “përvojë”. Në daljen e tij të dytë, roboti u mbështet nga një mekanizëm me litar, ndërsa pjesë të trupit së thyer mbeteshin ende në skenë. Për momentin, Aldol është hequr nga ekspozimi publik deri në rishikimin e sistemeve të ekuilibrit.
