OpenAI sapo ka prezantuar GPT-4, versionin më të ri të sistemit të inteligjencës artificiale që fuqizon ChatGPT. Kompania tregon se ky version është shumë më kreativ se ai paraardhës dhe se ka shumë pak gjasa që të shpikë fakte të reja.
Sam Altman, bashkëthemeluesi i OpenAI tregon se ky është “modeli më i aftë që kompania ka krijuar”, dhe falë aftësive multimodale GPT-4 mund të pranojë metoda të reja ndërveprimi, si përshembull nëpërmjet imazheve apo audiove.
Versioni i ri mund të përpunojë tekste shumë të mëdha në formën e inputit, duke analizuar më tepër se 20,000 fjalë njëherazi. Me pak fjalë, ju mund të përdorni si prompt një novelë në GPT-4. Për momentin modeli i ri është i aksesueshëm vetëm nga përdoruesit e abonuar në ChatGPT Plus.
OpenAI ka punuar gjithashtu dhe me partnerë komercialë për të ofruar shërbime të fuqizuara nga GPT-4. Një plan i ri me pagesë në aplikacionin Duolingo, Duolingo Max, do të bëjë të mundur gjenerimin e bisedave në frengjisht apo spanjisht, madje GPT-4 do t’i tregojë përdoruesve për gabimet që kanë bërë.
“Inteligjenca artificiale ka qenë gjithmonë një pjesë e rëndësishme e strategjisë sonë.” tha menaxheri i lartë i produktit në Duolingo, Edwin Bodge. “Ne e kemi përdorur atë për personalizimin e mësimeve si dhe funksionimin e testeve në anglisht të Duolingo. Megjithatë kishte disa hapësira ku ne dëshironim të përmirësoheshim, si përshembull praktika nëpërmjet bisedimit si dhe feedback-u kontekstual i gabimeve.”
