OpenAI prej disa kohësh po mendonte monetizimin e fenomenti viral ChatGPT, dhe ditën e djeshme ka lajmëruar se përdoruesit do të mund të abonohen tashmë në një plan me pagesë për ChatGPT ku do të kenë shërbime ekstra.
Çmimet e abonimit në ChatGPT Plus do të nisin nga $20 në muaj, dhe të gjithë përdoruesit do të kenë benefite të ndryshme si përshembull aksesi i përhershëm dhe në kohët e mbingarkuara, përgjigje më të shpejta si dhe prioritet në aksesimin e shërbimeve dhe përmirësimeve të reja.
Sigurisht ju do të mund ta përdorni ChatGPT dhe pa u abonuar, thjesht nuk do të keni akses në shërbimet premium. Për momentin, ChatGPT Plus është i aksesueshëm vetëm në SHBA, dhe së shpejti do të zgjerohet në regjione të tjera.
“Ne e lançuam ChatGPT si një studim nga ku mund të mësonim më tepër rreth pikave të forta dhe të dobëta të sistemit, si dhe të grumbullonim një feedback nga përdoruesit që na ndihmon shumë.” tregoi OpenAI në një postim në blog. ”Që nga ajo kohë, me miliona njerëz na kanë informuar rreth eksperiencës së tyre, dhe ne kemi bërë disa përmirësime të rëndësishme dhe madje kemi parë që shumë përdorues e përdorin ChatGPT në mënyrë profesionale duke rregulluar problemet drejtshkrimore, për gjenerimin e ideve, për ndihmë në programim dhe mësimin e temave të reja.”
ChatGPT Plus është plani i parë i abonimit nga kompania, dhe pse tregohet se OpenAI po punon për të ulur çmimin e abonimit.
