Në këtë pikë është mjaft e sigurt që Galaxy Ring, produkti i ri i Samsung në një kategori të re të wearables me fokus shëndetin, nuk do të vijë këtë vit.
Tani Ice Universe tregon se kjo unazë do të prezantohet në të njejtin event ku do të prezantohet dhe seria e re e smartphone-ve flagship Galaxy S24, në janar. Edhe më e rëndësishmja, duket sikur Samsung ka pritshmëri të mëdha për këtë linjë të re produktesh, pasi leaker-i Ice Universe thotë se Galaxy Ring do të jetë produkti më i rëndësishëm i eventit, ndoshta duke e kaluar dhe vetë serinë Galaxy S24. Ndërsa ngjarjet Unpacked për seritë S22 dhe S23 ishin në shkurt, ka pasur edhe evente në janar.
Dhe ne tashmë po shohim informacione të detajuara rreth serisë Galaxy S24, kështu që një lançim pak më i hershëm duket mjaft i mundshëm. Sa i përket unazës, pyetja mbetet nëse do të jetë gati me kohë.
Samsung thuhet se është gati të fillojë prodhimin në masë, por gjërat po ecin ngadalë për shkak të lejeve rregullatore shtesë të nevojshme për një produkt të kujdesit të shëndetit. Unaza pritet të sintetizojë veçoritë e fokusuara drejt shëndetit që gjenden në orët Galaxy duke hequr pjesën më të madhe të veçorive të orëve inteligjente (nuk është e qartë nëse do të ketë edhe një ekran).
Forma më e vogël dhe më pak penguese e Unazës Galaxy mund të sjellë një audiencë më të gjerë – njerëz që preferojnë orët klasike ose nuk duan të mbajnë fare një orë, por ende duan të ndjekin gjumin, rrahjet e zemrës dhe gjurmim të ushtrimeve. Dhe nëse Ice ka të drejtë, kjo do të jetë më shumë se një brez inteligjent në formë unaze, do të jetë gjëja tjetër e madhe e Samsung në pajisjet wearable.
