Frika se inteligjenca artificiale mund të “ngjallet” shtohet akoma më shumë pas studimit të ri që tregon se versioni më i ri i ChatGPT po tregon shenja të arsyetimit human. GPT-4 iu kërkua që të vendoste mbi njëra tjetrën një libër, 9 vezë, një laptop, një shishe dhe një gozhdë në mënyrë që ato të ishin të qëndrueshme.
Sistemi arriti që të vendoste objektet në mënyrë që vezët të mos thyheshin, duke detajuar veprimet që një njeri duhet të bëjë hap pas hapi, fillmisht duke vendosur një libër dhe në fund gozhdën. Megjithatë aftësia për të menduar një vendosje të tillë duke llogaritur dhe thyerjen e vezëve është një aftësi që vetëm humanët mund ta kuptojnë.
Ky studim nga Microsoft mund t’i hedhë benzinë zjarrit të ngritur nga shqetësimet se AI po progreson me shpejtësi shumë të mëdha dhe se deri në vitin 2045 do të jetë e pakontrollueshme nga njerëzit.
Pete Lee, i cili drejtoi këtë studim tregoi për New York Times: “Fillimisht unë isha tepër skeptik, një ndjenjë e cila më pas u zëvëndësua nga shqetësimi, frustrimi dhe madje frika.” Ky studim është publikuar që në mars të këtij viti, mirëpo vetëm tani ka arritur të fitojë vëmendjen e njerëzve.
Për të testuar aftësitë e mësimit dhe memorizimit, ekipi i studiuesve i kërkoi ChatGPT “të vizatonte një njëbrirësh në TikZ” 3 herë përgjatë një muaji. Rezultatet herë pas here tregonin një evoluim në detajet e vizatimeve të GPT-4.
